Në Vatikan ka përfunduar ceremonia mortore për Papa Françeskun, ku morën pjesë liderë botërorë dhe qindra mijëra besimtarë nga e gjithë bota.
Pas meshës në Sheshin e Shën Pjetrit, arkivoli me trupin e Papës u nis në një procesion solemn drejt kishës Santa Maria Maggiore në Romë, ku do të kryhet ceremonia e varrimit.
Procesioni përshkon një itinerar prej rreth 6 kilometrash nëpër qendrën historike të Romës, duke kaluar pranë Koloseut dhe Piazza Venezia.
Publiku mund ta ndjekë procesionin nga pas barrierave të vendosura përgjatë rrugës, ndërsa mbi 3000 vullnetarë janë angazhuar për të ndihmuar dhe orientuar pelegrinët.
Ceremonia e varrimit në Santa Maria Maggiore do të zhvillohet pa praninë e publikut, ndërkohë që jashtë kishës janë mbledhur turma besimtarësh për t’i dhënë nderimet e fundit Atit të Shenjtë.
Në meshën mortore ishin të pranishëm përfaqësues nga më shumë se 150 vende, përfshirë Presidentin e Shqipërisë Bajram Begaj, ministrin e Jashtëm Igli Hasani, Presidenten e Kosovës Vjosa Osmani dhe kryeministrin në detyrë Albin Kurti.
Në ceremoni morën pjesë gjithashtu Presidenti amerikan Donald Trump, Presidenti francez Emmanuel Macron, Presidenti gjerman Frank-Walter Steinmeier, si dhe presidentët e Italisë, Ukrainës, Argjentinës, Filipineve, Polonisë, Britanisë së Madhe dhe Zelandës së Re.
Prania e disa përfaqësuesve të familjeve mbretërore, përfshirë Princin William të Britanisë, dha një tjetër dimension solemniteti ceremonisë, ku ishin të pranishëm edhe 224 kardinalë, 750 peshkopë dhe priftërinj nga e gjithë bota.
Papa Françesku ndërroi jetë më 21 prill, në moshën 88-vjeçare, pas një sulmi në tru. Gjatë tri ditëve të fundit, rreth 250 mijë besimtarë kaluan përpara trupit të tij në Bazilikën e Shën Pjetrit, për të nderuar Papën që njihej për përkushtimin ndaj të pambrojturve dhe thjeshtësinë e tij njerëzore.
