Mesa duket Partia Demokratike nuk do të dorëzohet. Në një deklaratë për median pas përfundimit të Mbledhjes së Kryesisë së PD, Basha është shprehur se opozita ka marrë vendimin e prerë se ka për t’i vazhduar protestat në të gjithë vendin deri në momentin që Rama të rrëzohet nga pushteti.
Si parti, PD-ja do të organizojë protesta mbarë popullore, të paktën këto janë fjalët e Bashës në deklaratë, në të cilën thekson edhe ndërtimin e një kalendari për të gjitha kryengritjet që do të zhvillohen.
“Do të hartohet një kalendar për vazhdimin e protestave në të gjithë vendin. Është marrë një vendim për ngritjen e shtabeve në nivel qendrorë dhe lokal, të cilët në bashkëpunim me opozitën e bashkuar do të bëjnë të mundur organizimin e protestave në të gjithë vendin. Morëm vendimin për shpalosjen e programit të PD. Ne do t’i japim Shqipërisë vizionin tonë me besimin se Shqipëria do të ketë një të ardhme.
Bashkë me qytetarët shqiptarë do të marrim vendime se si do të shkojë kjo e ardhme. Politikat tona për pensionet, për biznesin, sipërmarrjen që të hapë vende pune, politikat tona për zhvillimin ekonomik dhe një vendi në krah të njerëzve. Morëm vendimin për ndërthurjen e këtij turi protestash me një tur programi për Shqipërinë”, tha Basha pas mbledhjes së kryesisë për mediat.
