Në vazhdim të Lojërave Olimpike në Tokio të Japonisë, ka garuar edhe atleti tjetër shqiptar, Izmir Smajlaj. Shkodrani konkurroi në baterinë A në kërcim së gjati, por nuk mundi të kualifikohej për në finale.
Atleti kërceu 7.81 metra në provën e parë, ndërsa në të dytën kërceu 7.86 metra. Në tentativën e tretë ai bëri faull dhe e mbylli konkurrimin në vendin e nëntë në baterinë A, ndërsa në renditjen e përgjithshme e mbylli i 17-i.
Megjithatë, performanca e Izmir Smajlajt në këto Lojëra Olimpike ishte më e mirë se ajo në Olimpiadën “Rio 2016” pesë vite më parë. Në Olimpiadën e Brazilit atleti shkodran nuk shkoi dot më shumë se 7.72 metra, por që sërish ishte larg nga rekordi i tij personal prej 8.11 metrash.
Deri tani në Tokio kanë garuar edhe dy peshëngritësit Briken Calja dhe Erkand Qerimaj. Calja e mbylli në vendin e katërt garën në peshëngritje deri në 73 kg, renditja më e mirë për Shqipërinë. Ndërkohë, Qerimaj garoi sot dhe e mbylli në vendin e nëntë garën deri në 81kg, ndërsa u rendit i pari në baterinë B me 338 kg të ngritura.
Ndërkohë, sytë janë tashmë nga atletja Luiza Gega që pritet të konkurrojë të dielën në garën 3000 metra me pengesa.
