Joachim Low nuk do të jetë më trajner i Gjermanisë. Ka qenë ai vetë që e ka njoftuar vendimin, pas humbjes në çerekfinale ndaj Anglisë, me rezultatin 2-0. Low largohet nga Gjermania pas 15 vitesh, edhe pse kishte shpresuar se do të shkonte në Wembley për finalen dhe jo për eliminimin në raundin e 1/16-ve.
Golat nga Raheem Sterling dhe Harry Kane në 15 minutat e fundit bënë që Die Mannschaft të pësonte një humbje të parë ndaj Tre Luanëve në një ndeshje me eliminim direkt që nga Kupa e Botës 1966. Një fund ky zhgënjes për Low, që arriti kulmin me fitoren e Kupës së Botës në Brazil 2014.
Low u shpreh se nw kwto vite janw shumw gjwra pozitive qw do tw mbahen mend e sidomos Kupa e Botws nw Brazil.
“Në këto 15 vjet kishte shumë gjëra pozitive, unë mora pjesë në Kupën e Botës në shtëpi në 2006 (si ndihmës trajner), ne u zhvilluam më tej, ne fituam titullin në vitin 2014 si pika kryesore, pastaj Kupa e Konfederatave në 2017 me një ekip të ri. Ka lidhje shumë të forta që janë bërë, që nga viti 2018 kemi pasur disa probleme – ka pasur kohë të vështira. Ato që mbeten janë shumë momente me shumë njerëz dhe fitoret, disa humbje gjithashtu, unë kam marrë mësime.
Zhgënjimi është i pranishëm, do të qëndrojë për një kohë, kjo është e qartë, ju nuk e harroni menjëherë, do t’ju duhet një kohë e caktuar, por unë jam i sigurt se ka shumë gjëra pozitive që unë mund t’i veçoj nga këto 15 vjet
Unë dua të falënderoj lojtarët që dhanë më të mirën e tyre, lojtarët që nuk janë më me ne”, ka thënë Low.
Ndërkohë, ai tha se nuk ka marrë ende ndonjë vendim për të ardhmën, por do të vendosë në javët në vazhdim.
“Për momentin nuk kam marrë ndonjë vendim,” tha ai. “Kur vendosa të ndalem pas këtij turneu kisha mendime të ndryshme, por do t’i shohim në ditët dhe javët e ardhshme. Pas 15 vjetësh në krye do të bëjë mirë të tërhiqem dhe do të ketë energji të re tek unë dhe më tej do të vendos. Në të vërtetë nuk kam një plan konkret.
Më duhet një pushim emocional, kështu që është normale që të duhet pak distancë dhe të mos kërkoj një projekt të ri. Do të më duhet kjo kohë, por do të ketë detyra të reja që do të jenë interesante për mua”, deklaroi Low.
Low drejtoi Gjermaninë për 15 vite, duke e shpallur kampione bote në vitin 2014. Po ashtu ai ka qenë me ekipin në dy gjysmëfinale të Kupës së Botës, në shtëpi si ndihmës trajner, dhe në vitin 2010 në Afrikën e Jugut.
