Në prangat e Policisë së Skraparit, kanë rënë dy persona, të akuzuar për tentativën e kultivimit të lëndëve narkotike. Mësohet se në pranga kanë rënë dy vëllezër Emiljano dhe Ardenis Rama.
Policia bën me dije se në tokën në pronësi të dy vëllezërve, u gjetën fidanë të dyshuar kanabis. Po ashtu, kjo lëndë u gjet edhe në banesën e tyre. Gjatë kontrollit, shërbimet e Policisë kanë gjetur kubikë me fidanë të dyshuar cannabis sativa pranë tokës në pronësi të tyre në fshatin Barçë. Materialet i kaluan Prokurorisë së Rrethit Gjyqësor Berat, për veprime të mëtejshme.
Njoftimi i policisë:
Arrestohen 2 autorët e dyshuar të tentativës për kultivim.
Sekuestrohen fara cannabis dhe një radiomarrëse.
Shërbimet e Policisë Skrapar, në bazë të informacioneve të siguruara, në vijim të kontrollit të territorit, me qëllim evidentimin dhe goditjen e rasteve të tentativës për kultivim të bimëve narkotike, kanë evidentuar në fshatin Barçë, Skrapar, kubikë me fidanë të dyshuar cannabis sativa.
Në përfundim të veprimeve të para hetimore, specialistët për Hetimin e Krimeve në Komisariatin e Policisë Skrapar arrestuan në flagrancë shtetasit E. R., 39 vjeç dhe A. R., 35 vjeç (vëllezër), të dy banues në fshatin Barçë. Gjatë kontrollit, shërbimet e Policisë kanë gjetur kubikë me fidanë të dyshuar cannabis sativa pranë tokës në pronësi të këtyre shtetasve. Gjithashtu, në banesën e shtetasit E. R. u gjetën fara të dyshuara cannabis sativa dhe një radio dore komunikuese.
Materialet i kaluan Prokurorisë së Rrethit Gjyqësor Berat, për veprime të mëtejshme.
