Me marshin funebër të interpretuar nga banda e qytetit dhe me lule të hedhura mbi arkëmort, u përcoll për në banesën e fundit ikona e teatrit dhe kinematografisë shqiptare, Margarita Xhepa, e nderuar me titullin “Nder i Kombit”.
Artistja u nderua me një ceremoni shtetërore në ambientet e Teatrit të Operas dhe Baletit, ku morën pjesë kolegë të saj, aktorë të brezave të ndryshëm, familjarë dhe qytetarë, të cilët i bënë homazhe me përulje dhe duartrokitje në këtë ndarje të dhimbshme.
Pas përfundimit të homazheve, djali i saj, aktori Ndriçim Xhepa, u shpreh për mediat se filmi i fundit ku Margarita Xhepa interpretoi, “Bolero në vilën e pleqve”, përbën një mbyllje të denjë dhe të bukur të perdes mes jetës dhe artit për të.