Në fshatin Daullas të bashkisë Fier, vendgrumbullimi i mbetjeve u përfshi nga flakët gjatë paradites së sotme.
Si pasojë e flakëve janë djegur edhe disa goma, çka ka alarmuar banorët, pasi pranë kësaj zone ndodhen varrezat e fshatit.
Shërbimet zjarrfikëse kanë ndërhyrë shpejt dhe kanë arritur të shuajnë flakët, ndërsa policia po heton rrethanat e ngjarjes. Megjithatë, tymi ka mbuluar zonën, duke shkaktuar shqetësim për banorët.
Ky është rasti i katërt brenda pak ditësh, pas Vlorës, Lezhës dhe Kukësit, ku mbetjet digjen në ambiente të hapura, duke rrezikuar shëndetin e qytetarëve dhe duke shkaktuar ndotje të madhe të ajrit.
Djegia e mbetjeve në ambientet e hapura nuk është vetëm një fenomen sezonal, por pasqyron dështimin sistematik të menaxhimit të mbetjeve në vend.
Ligji nr. 10 463/2011 “Për menaxhimin e integruar të mbetjeve” i ngarkon njësitë vendore me përgjegjësinë për mbledhjen dhe menaxhimin e sigurt të mbetjeve, përfshirë edhe sigurimin e vendgrumbullimeve.
Megjithatë, në praktikë asnjë bashki nuk është ndëshkuar për zjarret që ndotin ajrin dhe asnjë drejtues lokal nuk është bërë përgjegjës për dëmet ndaj shëndetit publik.
Kodi Penal parashikon deri në 7 vjet burg për ndotje të rëndë mjedisore, por këto dispozita mbeten të paaplikuara në realitet.
Në rastet kur zjarret janë të qëllimshme, ato përbëjnë krim mjedisor, ndërsa në rastet e paaftësisë apo mosveprimit tregojnë papërgjegjshmëri të plotë institucionale. Në të dyja rastet, autorët duhet të hetohen dhe të mbajnë përgjegjësi.
Përgjegjësia nuk është vetëm në nivel lokal. Ministria e Mjedisit ka një rol të rëndësishëm në monitorimin dhe ndërhyrjen për të parandaluar këto fenomene, por deri tani nuk ka ndërmarrë masa efektive. Zjarret përsëriten çdo vit, tymi mbulon qytete të tëra dhe nuk ka mekanizma të aktivizuar për të adresuar këtë krizë.
Kjo situatë është një pasqyrë e qartë e një sistemi që funksionon në mënyrë të jashtëligjshme, duke lejuar djegien dhe deponimin e pakontrolluar të mbetjeve, pa transparencë dhe pa përgjegjësi. Ndëshkimi i shkelësve mungon, ndërsa kriza mjedisore dhe shëndetësore përkeqësohet çdo ditë.
