Myrto Uzuni, sulmuesi i dëmtuar i Granadas, pavarësisht pengesave, ka lënë gjurmë të thella këtë sezon në La Liga, duke shënuar 11 gola dhe duke dhuruar 1 asist në 32 ndeshje. Uzuni ka tejkaluar lojtarë si Rodrigo, Hoselu, Zhoa Feliks dhe Rafinja për sa i përket numrit të golave, duke treguar një performancë të shkëlqyer.
Megjithëse ka një kontratë që zgjat deri në vitin 2026, spekulimet rreth së ardhmes së tij janë të larta, veçanërisht me mundësinë që Granada të bjerë nga kategoria. Mediat në Spanjë raportojnë se Las Palmas ka shfaqur interes për të marrë Uzunin me një marrëveshje huazimi që përfshin edhe të drejtën e blerjes. Vendimi përfundimtar do të varet nga dëshira e vetë lojtarit.
Las Palmas është në kërkim të përforcimeve në repartin sulmues, pasi performanca e tyre ka qenë më pak se e kënaqshme gjatë sezonit aktual. Shtimi i Uzunit në skuadër shihet si hapi i duhur për të stabilizuar ofensivën dhe për të përmirësuar rezultatet në të ardhmen.
