Marko Knezheviç, i njohur me nofkën ‘Drug Crni’, nga rrethina e Beogradit, që dyshohet të jetë spiun i Agjencisë së Inteligjencës së Sigurisë serbe (BIA), është arrestuar nga policia. I arrestuari është bashkëpunëtor i ngushtë i ish drejtorit të BIA-s, Aleksandar Vulin, shkruan KosovaPress.
Pas arrestimit i njëjti është dërguar në stacionin e policisë në veri të Mitrovicës e me urdhër të prokurorit pastaj është ndaluar për 48 orë. Policia e Kosovës ka bërë po ashtu të ditur se është bastisur edhe banesa e të dyshuarit më Mitrovicë të Veriut, ku janë gjetur dokumente të ndryshme e laptop që mund të kontribuojnë në hetimin tutje.
Raportohet se Knezheviç gjatë kohës sa ka qëndruar në territorin e Republikës së Kosovës ka përdorur dokumentacion të një personi me nacionalitet serb, tashmë të vdekur, nga fshati Frashër (Svinjare) të Mitrovicës.
