Rasti i rëndë i përdhunimit të 15-vjeçares në Babrru, është bërë motiv për të ngritur tonet në mbledhjen e aleancës së grave deputete.
Mimi Kodheli, Vasilika Hysi, Elona Gjebrea, por edhe zv.ministrja, Romina Kuko, që ishte e pranishme në këtë mbledhje, ngritën zërin për këtë fenomen shqetësues që po zhbën shumë nga vlerat e shoqërisë shqiptare.
Mimi Kodheli, bëri edhe një krahasim me kohën kur ajo kishte qenë nxënëse, duke vënë theksin te roli që duhet të luajnë mësuesit.
Ndërsa akoma dhe më e ashpër ishte edhe deputetja Vasilika Hysi, e cila e konsideroi një turp për shoqërinë dhe se duhet të merren masa sa më shpejt, ose përndryshe t’i braktisin mandatet dhe të vijojnë profesionet e tyre të mëparshme.
Sipas “Panorama.al”, debati në këtë mbledhje është censuruar, pasi videoja e mbledhjes online mbeti vetëm pak orë në faqen e “Facebook-ut” të Kuvendit.
Në orët e vona të mbrëmjes, videoja u fshi nga faqja online e Kuvendit në “Facebook”.
Debati në mbledhje:
Romina Kuko(zv.ministre): Është një rast i rëndë, që ne na ka tronditur që në momentin e parë që u sinjalizuam nga media.
Nuk është e vërtetë që ka pasur një denoncim të mëparshme të rastit. Puna reaktive e Policisë ka qenë në nivele të mira, por ajo proaktive nuk ka qenë në nivelet që duhet.
Problem është që nuk kemi pasur asnjë sinjalizim nga shkolla. Do duhej të shikojmë edhe reagimin e shoqërisë ndaj këtij rasti. Shqetësues është edhe stigma që jepet ndonjëherë ndaj viktimës.
Mimi Kodheli: Mendoj se duhet të ulemi dhe të hartojmë një paketë ligjore, që do t’u kundërvihen fenomeneve, për të cilat ne sot po flasim.
Unë besoj se duhej të kishim përfaqësues të Ministrisë së Arsimit, pasi, për shkak të militantizmit në punësime, ne vazhdojmë të punësojmë njerëz që nuk kalojnë në asnjë scrennig dhe janë persona që kanë kontakte të drejtpërdrejta me fëmijët apo me të pamundurit.
Ne i konsideronim mësuesit si prindërit tanë të dytë. Unë i takoj asaj gjenerate që mësuesja thoshte, ‘Pse ka munguar Mimi sot? Ka pasur temperaturë?
Ndërsa zyshat tona sot e kanë mendjen për të bërë të tjera punë.
Nuk të del koha të bësh ditarin si zyshë edhe të lyesh flokët, të blesh buzëkuqe apo minifunde, nuk ka mundësi.
Zyshat tona kanë qenë të pamartuara dhe nuk bënin fëmijë, sot nuk kuptohet fare se kush është e martuar dhe kush jo.
Lëre pastaj për rojet, që nuk kuptohet dhe nuk kuptohet. Tani do të marrim këtë situatë në dorë apo do bëjmë sikur flasim sa bukur, sa bukur.
Tani kam diçka edhe për zonjën Kospiri. A kemi statistika, se pa to nuk mund të shkojmë gjëkundi.
Ju betohem që nuk ka asnjë vend në botë që nuk ka pasur statistika për dhunën në familje. Vetëm ne në Shqipëri nuk kemi, po bukur fort, shyqyr që nuk kemi pasur dhunë.
