“Lufta e vërtetë kundër korrupsionit do të fillojë kur t’u sekuestrohen vilat dhe llogaritë bankare politikanëve.” Por ndërsa disa peshq të vegjël përfundojnë pas hekurave, peshkaqenët e vërtetë të korrupsionit vazhdojnë të notojnë të lirë në detin e privilegjeve që kanë krijuar vetë.
Në majë të piramidës së pushtetit qëndron kryebashkiaku Erion Veliaj – mjeshtri i vërtetë i lojës së dyfishtë. Ndërsa flet për transparencë dhe ndershmëri, ka gjetur “strehën” e tij në një nga vilat luksoze të Kodrës së Diellit, pronë e biznesmenit Gentian Sula. Bashkë me të kanë zënë vend edhe krahu i tij i djathtë, Arbjan Mazniku, dhe megafoni i qeverisë, Endri Fuga. Tre shokët e vjetër që dikur protestonin kundër korrupsionit, sot janë mishërimi i tij më i pastër.
Është një vëllazëri e vjetër. Që nga ditët e G99 dhe Lëvizjes Mjaft, këta “revolucionarë” të vetëshpallur po përgatisnin terrenin për atë që do të bëhej perandoria e tyre e korrupsionit. Sot, ata kontrollojnë gjithçka – nga tenderat te mediat, nga pronat te institucionet.
Loja është e thjeshtë. Sula të jep vilën luksoze, ti i jep tenderat. Kompania e tij, Agi Kons, thith miliona nga buxheti i Bashkisë përmes tenderave pa garë. 620 milionë lekë për “riorganizimin” e Bashkisë – një projekt fantazmë që ekziston vetëm në letër. Tenderi u dha pa konkurrencë reale, me një urgjencë të pashpjegueshme. Procedurat u manipuluan hapur, kriteret u shkruan posaçërisht për kompaninë e Sulës.
Por lakmia nuk njeh kufi. Një godinë dy katëshe në zemër të Tiranës, pronë e familjes Sula, i është dhënë pa qira bashkëshortes së kryebashkiakut, Ajola Xoxës – një dhuratë që kushton 25 mijë euro në muaj. Ndërkohë kompania e Sulës vazhdon të fitojë një pas një tendera nga Bashkia e Tiranës, nga eventet kulturore te mirëmbajtja e shkollave.
Mazniku, mjeshtri i përfitimeve të dyfishta, e ka përsosur artin e vjedhjes. Si zv.kryetar bashkie mori dy herë pagesën për të njëjtin hotel në Barcelonë – një herë nga biznesmeni Fusha dhe një herë nga arka e Bashkisë. Kur u zbulua, gënjeu duke thënë se kishte rimbursuar paratë në cash – një histori që as Prokuroria nuk e besoi dot.
Emri i tij del në çdo aferë të madhe, nga dosja “5D” te skandali i biletave. SPAK ka zbuluar se si firma e dyshimtë “5D” fitonte tendera me firmën e Veliajt dhe Maznikut, në një skemë që ka çuar tashmë disa zyrtarë pas hekurave. Në çdo dokument të prokurorisë, emri i Maznikut qëndron si një vulë korrupsioni.
Historia e tradhtisë arrin kulmin me çiftin Sula. Gentiana, gruaja e Gentianit, u ngrit në krye të Autoritetit të Dosjeve me bekimin e Ilir Metës. “E njeh këtë Genta Sulën?”, i thoshte Meta Ramës. “Është grua e rrallë, me integritet.” Por sapo Meta u largua nga Presidenca, ajo i nguli thikën pas shpine, duke publikuar dokumentet që e akuzonin si bashkëpunëtor të Sigurimit nëpërmjet inicialeve “I.M.”. Kur Meta reagoi ashpër, ajo u tërhoq me frikë, duke mohuar atë që vetë institucioni i saj kishte publikuar – një kukull e dobët në duart e pushtetit të ri.
Kjo oligarki e re shtrihet në tre fortesa luksi – Kodra e Diellit e Sulës, dhe komplekset Green Coast e Rolling Hills të Samir Manes. Këtu vilat shiten e rishiten mes politikanëve dhe gazetarëve në çmime që sfidojnë logjikën, duke fshehur transaksione të dyshimta. Mane ka krijuar një sistem perfekt ku paratë e zeza kthehen në vila luksoze, ndërsa politikanët dhe gazetarët e fuqishëm blejnë vende në këto oaze privilegji.
Në këto kështjella moderne kanë gjetur strehë gazetarë që kontrollojnë mediat më të mëdha të vendit, figura të njohura të ekranit që mbulojnë realitetin me shkëlqimin e tyre sipërfaqësor, dhe një ushtri e tërë drejtorësh e zyrtarësh që marrin pjesë në afera të pista. Është një rreth vicioz ku gazetarët blejnë heshtjen me vila, ndërsa politikanët blejnë mbrojtjen me tendera.
Heshtja e medias është po aq e lartë sa muret që rrethojnë vilat e tyre luksoze. SPAK heton, por pyetjet thelbësore mbeten pa përgjigje. Si mundet që të njëjtat kompani të fitojnë vazhdimisht tendera pa garë? Si justifikohen këto vila miliona-euroshe të njerëzve që zyrtarisht jetojnë me rroga shteti? Si shpjegohen transaksionet e dyshimta që kalojnë nga një dorë në tjetrën pa lënë gjurmë?
Ndërsa lufta e vërtetë kundër korrupsionit pret ende të fillojë, grupi i privilegjuar vazhdon të begatojë perandorinë e tij. Në Tiranën e sotme, korrupsioni shpërblehet me vila dhe tradhtia paguhet me tendera. Është një sistem perfekt ku të gjithë fitojnë – përveç qytetarëve që paguajnë çmimin përfundimtar me taksat e tyre, me të ardhmen e tyre, me shpresat e tyre për një qytet që dikur premtonte të ishte ndryshe.
/gazetareforma.com
