Pensionistët e grupimit “Pensionistët Bashkë”, mbështetur nga Lëvizja Bashkë, janë grumbulluar për të shtatën herë para Kryeministrisë për të kërkuar pensione dinjitoze.
Ata kanë theksuar se do të vazhdojnë protestat dhe po mbledhin firma për një peticion kombëtar.
Kërkesat e tyre përfshijnë përkrahje sociale dhe rishikim të pensioneve, ndërkohë që protestuesit kërkojnë:
• Vendosjen e një minimumi jetik prej 20,000 lekësh për pensionin minimal.
• Indeksimin e pensioneve dy herë në vit, në lidhje me rritjen e çmimeve dhe pagës mesatare.
• Uljen e moshës për pensionin social në 65 vjeç.
• Miratimin e “Statusit të Minatorit”.
Peticioni kërkon gjithashtu përmirësimin e shërbimeve shëndetësore dhe sociale, si rritjen e buxhetit për shëndetësinë në 5% të PBB-së dhe rimbursimin e plotë të ilaçeve, shërbim shëndetësor falas për personat me vështirësi në lëvizje, dhe krijimin e infrastrukturës sociale, si ndërtimi i parqeve, bibliotekave dhe transporti urban falas për pensionistët.
Ish-minatorët janë një grup aktiv dhe kërkesa për Statusin e Minatorit mbetet një pikë kyçe e protestave.
