Pavarësisht se kërkesat e tyre janë të tjera dhe më emergjente, kuvendi miratoi ndryshimet e parashikuara në aktin normativ të qeverisë, që i hap rrugë bonusit të pranverës për pensionistët. Sipas këtij vendim, bonusi do të shpërndahet për pensionistët në muajin shkurt.
Bonusi i pranverës do të jetë 100 euro për ata pensionistë, pensioni mujor i të cilëve është nën 20 mijë lekë dhe 50 euro për të gjithë ata që vlera e pensionit mujor të të cilëve është mbi 20 mijë lekë.
Në fakt shpërblimet e fundvitit, dikur një praktikë e zakonshme, janë kthyer tashmë në një “bonus elektoral,” që shpërndahet vetëm në prag të zgjedhjeve.
Është bërë praktikë që qeveria kujtohet që pensionistët janë të varfër vetëm kur afrohen zgjedhjet. Që kur kryeministri Rama doli në fund të vitit 2024 dhe e shiti këtë plan si një paketë të mirë për pensionistët, në fakt ka patur shumë reagime nga ekspert ekonomie apo pensionistë që e quajnë tallje.
Vetë pensionistët kanë dalë disa herë në protestë ku kërkojnë nga qeveria të rriten pensionet dhe të miratohet minimumi jetik, pasi nuk e zgjidh varfërinë e tyre një bonus për një muaj. Pensionistët gjithashtu quajnë si jo efektivë indeksimin e fundit që beri qeveria me 1.4% për pensionet. Ndërsa, Kuvendi vazhdon të bëjë një ‘vesh shurdh e një sy qorr’ përballë këtyre kërkesave të pensionistëve.
