Instituti i Sigurimeve Shoqërore ka nisur zbatimin e pagave të reja për llogaritjen e pensioneve për qytetarët që dalin për herë të parë në pension. Ky ndryshim përfshin përdorimin e koeficientëve të rinj për pagat e vitit 1994 dhe më herët, duke reflektuar një rritje të përfitimeve për pensionistët e rinj.
Për vitin 2023, koeficienti për pagat para vitit 1994 është rritur në 13.5%, një ndryshim i ndjeshëm nga vitet e mëparshme, dhe kjo do të prekë 83 profesione të ndryshme. Sipas vendimit të miratuar nga Këshilli i Ministrave, për dy vitet e fundit (2023 dhe 2024), nuk do të aplikohet formula e indeksimit të pagave, çka do të thotë se pagat do të mbeten në nivelet aktuale, pa ndryshime.
Çdo vit, rreth 20 mijë qytetarë dalin në pension dhe përfitojnë nga përditësimi i pagave, që synon rritjen e masës së përfitimeve të pensioneve. Përveç indeksimit të pensioneve, qeveria përcakton edhe koeficientët e rinj për llogaritjen e pensioneve të atyre që sapo dalin në pension, duke ndryshuar kështu formulën e përllogaritjes.
Përllogaritja e pensioneve merret kryesisht nga pagat e vitëve të kaluar, por për shkak të nivelit të ulët të pagave gjatë periudhës së kooperativave bujqësore dhe më pas, qeveria ka vendosur të rrisë çdo vit koeficientët për të siguruar një pension më të drejtë dhe afër realitetit të kohës.
Formula e re e përllogaritjes:
(Pensioni i Pleqërisë) = PS (Pensioni Social) × (Vjetërsi Kontributive të Realizuara / Vjetërsi Kontributive të Kërkuara) + 1/100 × (Vite Sigurimi) × BV (Baza e Vlerësuar).
Baza e vlerësuar për llogaritjen e pensioneve është e lidhur me shumën e pagave për të cilat janë paguar kontributet, dhe llogaritet në raport me periudhën e sigurimit. Për periudhën nga 1 janari 1994 e në vazhdim, kjo bazë përfshin pagat për të cilat janë paguar kontributet gjatë kësaj periudhe.
Për periudhën e sigurimit në institucione dhe ndërmarrje shtetërore para datës 1.1.1994, për llogaritjen e bazës së vlerësuar, merren parasysh pagat referuese të përcaktuara nga Këshilli i Ministrave. Po ashtu, për periudhën e sigurimit në ish-kooperativat bujqësore, bazën e vlerësuar e përbëjnë pagat referuese, të caktuara gjithashtu me vendim të Këshillit të Ministrave.
Në rastet kur personi ka periudha sigurimi para dhe pas datës 1.1.1994, baza e vlerësuar llogaritet si mesatare aritmetike e ponderuar e pagave të periudhës para dhe pas këtij viti, duke marrë parasysh periudhën e sigurimit si punonjës në institucione shtetërore, si anëtar i kooperativave bujqësore, dhe si punonjës pas vitit 1994.
