Gjykata Kushtetuese do të përcaktojë nëse komunikimet në platformën “Sky ECC” do të mund të shërbejnë si prova ose jo në hetimet e SPAK ndaj individëve apo grupeve kriminale që kanë përdorur këtë platformë komunikimi.
Deskriptimi i bisedave nga agjensitë ligj zbatuese ndërkombëtare dhe vënia në dispozicion të pjesës për Shqipërinë, ka çuar në arrestimin e dhjetëra personave, ndërsa SPAK ka ngritur akuza ndaj tyre. Përveç kësaj, bisedat kanë hedhur dritë mbi implikime në ngjarje kriminale të personave të ndryshëm, por kanë zbardhur gjithashtu edhe lidhjet mes krimit, politikës dhe disa biznesmenëve.
Pëllumb Gjoka, i shpallur investitor strategjik kërkon që komunikimet në “Sky ECC” të mos merrren si prova
Së fundmi, Pëllumb Gjoka, i shpallur investitor strategjik, i është drejtuar Gjykatës Kushtetuese pas refuzimit të Gjykatës së Lartë për t’i rrëzuar si prova dhe hequr masën e sigurisë të vendosur nga GJKKO. Gjoka kërkon nga Kushtetuesja pavlefshmërinë e komunikimeve “Sky ECC”. Padia ka kaluar nga dhoma e këshillimit në seance publike. Pritet që brenda pak ditësh Gjykata Kushtetuese të caktojë datën se kur do të mbahet seanca. Padia e Gjokës ndaj Prokurorisë së Posaçme, e cila me të dhënat e përftuara nga “Sky ECC” ka arrestuar dhe vënë nën akuzë, ndërsa personat nën akuzë kundërshtojnë mënyrën se si janë tërhequr aktet nga SPAK të vënë në dispozicion nga autoritetet belge e franceze. Kolegji kushtetueses parimisht ka vendosur ta kalojë në seancë publike por ende nuk ka asnjë vendimmarrje.
Investimet e tij strategjike përfshinin kompaninë “Imperial Group” dhe dy vite më parë iu dha e drejta të ndërtojë resortin “Silver Sand”, brenda pyllit në bregdetin e Velipojës.
Në atë kohë Rama është akuzuar se po mbronte dhe po favorizonte biznesmenin në fjalë, i cili as nuk kishte justifikuar pasurinë e vënë përgjatë 30 viteve.
Për t’i miratuar lejen e Investitorit Strategjik, kryeministri Edi Rama dhe ish-ministri Blendi Klosi, sipas mediave opozitare në atë kohë, i kishin hequr statusin “Zonë e Mbrojtur e Veçantë” pyllit Park Kombëtar të Velipojës me sipërfaqe 39 hektarë në zonën e caktuar për këtë resort.
Përveç këtyre akuzave edhe ish-kryeministri Sali Berisha ka akuzuar shpesh si trafikant, vrasës dhe kryetar bande Pëllumb Gjokën, për të cilin ka thënë se është mik i Tom Doshit dhe Edi Ramës.
Pas zgjedhjeve të 14 majit, Berisha tha se kandidati i PS-së, Benet Beci, në Shkodër, u ndihmua nga tri banda për të fituar si kryebashkiak, një prej të cilave ishte ajo e biznesmenit Pëllumb Gjoka.
“Pëllumb Gjoka ka mbajtur në pushtim të plotë qendrat e votimit në Velipojë. Kam dërguar atje anëtarin e Këshillit Kombëtar dhe shefin e kabinetit vetëm për të evidentuar, për t’i thënë Pëllumb Gjokës që ne po të shohim se çfarë po bën”, tha Berisha disa javë më parë.
Gjithashtu Gjoka akuzohej se kishte vrarë 90-vjeçaren nga Malësia e Madhe, Drane Hotaj, dhe më pas ka manipuluar me testamentin e saj duke i grabitur 390 mijë m2 tokë në bregdetin e Velipojës. Akuzat janë bërë nga vajza e së ndjerës.
SPAK nga ana tjetër kërkon që Kushtetuesja ta rrëzojë ankimin duke lënë në fuqi masat e dhëna nga GJKKO dhe apeli i GJKKO që i konsideron prova të ligjshme.
Pritet që deri të martën avokatët të dorëzojnë dokumentat shtesë që ka kërkuar Kushtetuesja.
