Legjenda braziliane e futbollit, Pelé është shtruar në një spital në Sao Paulo prej gjashtë ditësh, pasi iu nënshtrua një sërë ekzaminimesh rutinore, konfirmoi një nga përfaqësuesit e tij për mediat lokale.
Pele, 80 vjeç, raportoi më 31 gusht se ai shkoi në një spital në Sao Paulo për të kryer një sërë testesh rutinore që ishin shtyrë për shkak të pandemisë Covid-19, por ai siguroi në rrjetet e tij sociale se ishte mirë.
Sidoqoftë, siç u bë e ditur këtë të hënë, legjenda mbeti në spital që atëherë, megjithëse shkaqet e sakta që çuan në qëndrimin e tij në spitalin prestigjioz “Albert Einstein” në Sao Paulo nuk u konfirmuan.
I kontaktuar nga “Efe”, spitali ende nuk është shprehur për gjendjen shëndetësore të lojtarit, që konsiderohet si më i miri i shekullit të 20-të.
Sipas mediave të ndryshme vendase, gjatë ekzaminimeve rutinë u zbuluan disa ndryshime dhe ekipi mjekësor vendosi që të shtrohej në spital. Shëndeti i tre herë Kampionit të Botës është dobësuar vitet e fundit, gjë që, së bashku me pandeminë, e ka mbajtur atë praktikisht të mbyllur në shtëpinë e tij në bregdetin e Sao Paulo me familjen dhe miqtë e tij më të ngushtë, dhe larg fokusit të medias.
