Edhe pse protesta e studentëve sipas kryeministrit Rama e ka bërë të reflektojë duke marrë edhe masat e duhura, kjo nuk duket se është bërë brenda racionales, të paktën kështu shprehet pedagogu Ervis Iliazaj.
I ftuar në “Ekopolitikë”, pedagogu Iliazaj ka thënë se në asnjë vend të botës nuk janë miratuar brenda javës 11 VKM për arsimin e lartë ashtu siç Rama veproi.
Sipas tij këto janë vetëm vendime populiste të momentit dhe nuk e zgjidhin në mënyrë absolute çështjen e arsimit.
“Kjo tregon gjithë filozofinë e Ramës së “re”. Në Angli ka një shprehje, “populli do” dhe “populli merr” dhe Rama po e bën këtë. Kjo është shkatërruese për vendin. Venezuela para Chaves ka qenë ekonomia më e fortë e Amerikës Latine, me Chavesin, qeveria shpërndante frigorifer me VKM. Shoqëria shqiptare ka pritshmëri të larta nga shteti. Rama e di se shoqëria ka pritshmëri të lartë nga shtetit, por kjo është shkatërruese për ekonominë. Kjo protestë e studentëve ia ka dhënë qeverisë gjithë kompetencat për arsimin e lartë. Mbipushteti të çon në korrupsion. Në mënyrë arbitrare shpërndajmë paratë e taska-paguesve shqiptarë me PPP-të. Nuk ka dështuar koncesioni si instrument ekonomik, por këto janë koncione të korruptuara”, ka thënë pedagogu.
