Ashtu sikurse kishin paralajmëruar pedagogët do të hyjnë në grevë ditën e nesërme nëse nuk ka një reagim nga ana e qeverisë për plotësimin e kërkesave të tyre.
Sërish sot në një deklaratë për mediat kreu i sindikatës së pedagogëve, Sandër Kovaçi u shpreh se afati i fundit që do të pritet përgjigjja e qeverisë do të jetë ora 16:00. Gjithashtu ai shtoi se nëse përgjigjja do të jetë negative, ose nuk do të ketë asnjë reagim, atëherë prej ditës së nesërme rreth 10 pedagogë janë gati për të hyrë në grevë urie.
“Presim deri ditën e nesërme, për dy tre çështje kryesore që u kemi kërkuar, nuk janë përgjigjur pozitivisht. Do presim deri në orën katër përgjigjen e qeverisë, në grevë do të futen disa pedagogë, rreth 10… është grevë simbolike. Greva do të mbahen në një ambient të brendshëm të universitetit”, deklaroi Kovaçi.
Vlen të theksojmë se që prej fillimit të vitit të ri akademik, pedagogët kanë nisur revoltën e tyre, ku kërkesat kryesore lidhen me paga më të larta dhe kushte më të mira pune. Kërkesa kryesore e pedagogëve është rritja e pagës me 50% dhe nuk kanë rënë dakord me atë që u ka ofruar qeveria. Më herët qeveria ka miratuar në mbledhjen e Këshillit të Ministrave rritjen me 15% të pagave për pedagogët. Ministrja e Arsimit Evis Kushi, e cila tha se 7% të rritjes do ta mbulojë buxheti i shtetit dhe 8% nga vetë Universiteti.
