Partia Demokratike (PD) ka vendosur të thërrasë një protestë kombëtare më 12 korrik, ora 20:00, para Kryeministrisë. Vendimi u mor gjatë mbledhjes së Kryesisë së PD-së, dhe nënkryetari Luçiano Boçi shpjegoi në një deklaratë për mediat arsyet kryesore të kësaj proteste.
Boçi theksoi se pika e parë e protestës është kërkesa për lirimin e liderit të opozitës, Sali Berisha. “Liri për liderin e opozitës, kryetarin e PD-së, Sali Berisha. Shqipëria është i vetmi vend që mban të burgosur liderin e opozitës, pa fakte, pa akuzë, vetëm me urdhër politik,” deklaroi Boçi, duke e renditur këtë si arsyen kryesore për protestën.
Arsyeja e dytë, sipas Boçit, është krijimi i një qeverie teknike. Ai akuzoi kryeministrin Edi Rama për përdorimin e “skalionet e krimit, skalionet e administratës, skalionet e kriminalizuara të Policisë” për të mbledhur votat dhe mbajtur pushtetin, duke theksuar se me Edi Ramën kryeministër nuk mund të ketë zgjedhje të lira. “E vetmja që mund të garantojë zgjedhjet e lira është Qeveria teknike,” shtoi Boçi.
Gjithashtu, nënkryetari i PD-së theksoi se kjo protestë shënon hapjen e siparit të fitores së PD-së në zgjedhjet e ardhshme, dhe se është një rrugë drejt bashkimit të të gjithë demokratëve dhe spektrit opozitar, duke sjellë ndryshimin që qytetarët e kërkojnë dhe ndërkombëtarët e presin.
