Ndërsa Prilli është vetëm pak javë larg, kryetarët e partive më të mëdha në vend e kanë nistur tashmë “betejën” mes tyre. Mëngjesin e sotëm kreu opozitar, Lulzim Basha, ka postuar në rrjetin e tij social, Facebook, një sondazh të bërë sëfundmi nga vetë PD, ku rezultonte fitues me një diferencë të madhe votash.
Sipas sondazhit të selisë blu, 53.2 % e qytetarëve mendonin se Basha ishte kryeministri më i mirë dhe 38.7 % mendonin se ishte Rama.
“Faleminderit për mbështetjen e jashtëzakonshme. Në 25 Prill Shqipëria fiton dhe Rama humbet.”, shkruan Basha.
E menjëhershme ishte dhe kundër-përgjigja e kreut të PS, Edi Rama. Me tone mjaft ironizuese, ai i kujton Bashës lapsusin e disa viteve më parë, ndërsa nuk lë pa përmenduar dhe Çim Pekën si mbështetësin e tyre më të madh.
“7×7=53.2 – 42 = 33 copyright: qimi.net”, shkruan Rama.
Edhe gjatë ditës së djeshme pati përplasje të forta mes dy kryetarëve të partive më të mëdha në vend. Në një konferencë Rama i zbuloi një plan të vjetër që ai kishte me Bashën për shkrirjen e LSI.
“Kishim një plan me Bashën ta çonim LSI për skrap, por nuk pranoi Basha.”, shprehet kryeministri, duke krijuar kështu një diversion të fortë politik.
Kujtojmë se pas dy vitesh largimi nga Kuvendi me djegien së mandatave, Partia Demorkatike ka premtuar se do të jetë pjesëmarrëse në zgjedhjet e 25 prillit, duke propozuar kështu dhe planin e tyre politik.
Në këto zgjedhje si kurrë më parë do të jenë pjesëmarrëse “2 opozita”, ajo brenda dhe jashtë parlamentare.
