Ditën e sotme Policia e Shtetit ka nisur punën me përgatitjet e fundit lidhur me protestën e Partisë Demokratike që do të mbahet nesër, më 7 korrik para Kryeministrisë. Edhe nesër, ashtu siç është vepruar gjithmonë edhe në tubimet e shkuara, do të ketë kordonë me efektivë të Policisë së Shtetit që do të kujdesen për ruajtjen e rendit dhe të institucioneve nga protestuesit.
Nesër do të angazhohen rreth 1000 efektivë në terren, ndërsa në gatishmëri do të jenë edhe Forcat e Ndërhyrjes së Shpejtë dhe atyre RENEA. Gjithashtu në kuadër të këtyre masave do të ndalohet qarkullimi pas orës 16:00 tek të gjitha rrugët që të çojnë drejt Bulevardit ‘Dëshmorët e Kombit”.
Protesta e paralajmëruar nga Partia Demokratike pritet të nisë në orën 19:00 të së enjtes, ndërsa leje është marrë për të tubuar deri në orën 21:00 të mbrëmjes, por nuk përjashtohet mundësia e shtyrjes së tubimit.
Kujtojmë se Berisha tha se do të jetë një protestë e gjatë teksa paralajmëroi Ramën që mos merret me blinde.
“Populli zbret në histori. Alibejat bashkë me Bashën nuk janë të këshilluar të vijnë në protest. Janë si zjarrfikës. Dhe demokratët nuk I duan. Këshilla nuk është përjashtim. Unë nuk I kam përjashtuar, u jap këshill.
Unë mund të them një gjë. Kjo protest është thirrur bazuar në një opozitë të vërtetë. Ekziston. E dyta e bazuar në sontazhe se ekzistojnë pakënaqësi. 70% e shqiptarëve kërkojnë ndryshim.
LSI do marrë pjesë. Janë thirrur dhe do vijnë. Janë bërë diskutime dhe do vinë partitë opozitare. Agron Duka do jetë pjesmarrës, dhe nuk di ndonjë që s’do vi”, tha ai.
