Kontratat e lotimit të PD-së në SHBA duket se nuk janë duke i sjellë asnjë të mirë kreut të kësaj partie dhe ish-sekretarit të Përgjithshëm të saj.
Sipas Ballkanweb, Prokuroria e Tiranës ka thirrur Lulzim Bashën dhe Arben Ristanin ditën e enjte për t’u njohur me përgjigjen e letërporosisë së SHBA për çështjen në fjalë.
Po si ka ndodhur gjithçka që kemi ardhur deri në këtë moment?
Pas shkrimit në revistën amerikane “Mother Jones” Prokuroria ka nisur hetimet lidhur me fondet që kjo parti ka paguar për aktivitete të lobimit në Shtetet e Bashkuara të Amerikës, para zgjedhjeve të qershorit 2017.
Sipas Ballkanweb, janë katër kontrata dyshimta me vlerë rreth 600 mijë dollarë, para të cilat vijnë nga kompania “Binita Trade” pronë e dy shtetasve rusë. Paratë janë dërguar në llogaritë e kompanisë së Nikolas Muzin, i cili ka mundësuar takime të kryetarit të Partisë Demokratike Lulzim Basha me administratën e Presidentit amerikan apo zyrtarë te lartë atje . Sipas deklarimeve të kompanisë ‘Muzin’ ajo ka marrë tre pagesa, në një shumë prej 675 mijë dollarësh, për punën e saj në favor të Partisë Demokratike në vitin 2017: pagesa e parë mban datën 24 mars 2017 dhe është bërë nga firma ‘Biniatta Trade LP”, me një vlerë prej 150 mijë dollarësh, dy pagesat e tjera janë bërë nga Partia Demokratike, njëra më 27 mars, për 25 mijë dollarë, dhe tjetra më 9 qershor për 500 mijë dollarë. Nga këto deklarime të firmës Muzin, vetëm ajo prej 25 mijë dollarësh, është pranuar nga kryetari i PD-së, Lulzim Basha që është paguar nga PD-ja.
Partia Demokratike nuk ka pranuar asnjë lidhje me firmën ‘Biniatta Trade LP”, e cila rezulton e regjistruar në Edinburg të Skocisë dhe është në pronësi të një zinxhiri kompanish të regjistruara në Belizë – një shtet i Amerikës Qendrore, i njohur si parajsë fiskale. Vetë kryedemokrati prej nëntorit të vitit të kaluar ftoi prokurorinë të hapë hetimet për të sqaruar çështjen.
