Grupi Parlamentar i Partisë Demokratike ka depozituar kallëzim penal për veprën penale “shpërdorim detyre” ndaj Kryetarit të Kuvendit, Niko Peleshi. Sipas PD-së, kallëzimi lidhet me mosmbledhjen e Këshillit për Rregulloren, Mandatet dhe Imunitetin për shqyrtimin e kërkesës së SPAK ndaj Belinda Balluku.
Në njoftimin për shtyp, Grupi Parlamentar i Partia Demokratike thekson se ka paraqitur disa kërkesa zyrtare pranë Kuvendi i Shqipërisë për thirrjen e Këshillit të Mandateve, por këto kërkesa nuk janë marrë në konsideratë nga Kryetari i Kuvendit.
Sipas dokumentit, me shkresën nr. 43019 prot., datë 16.12.2025, Prokuroria e Posaçme ka paraqitur kërkesë për dhënien e autorizimit nga Kuvendi për arrestimin ose heqjen e lirisë së deputetes, zëvendëskryeministres dhe ministres së Infrastrukturës dhe Energjisë, Belinda Balluku. Pas kësaj kërkese, Këshilli për Rregulloren, Mandatet dhe Imunitetin u mblodh më 19.12.2025, në orën 10:30, për shqyrtimin e çështjes.
PD pretendon se mbledhja u ndërpre në mënyrë arbitrare nga Kryetari i Kuvendit, pa një vendimmarrje të Këshillit dhe pa caktuar një datë të re, me arsyetimin se anëtarëve dhe palëve duhej t’u jepej kohë për t’u njohur me dokumentacionin shoqërues.
Më tej, Grupi Parlamentar i PD-së thekson se pesë deputetë, anëtarë të Këshillit, duke u mbështetur në nenin 13, pika 6 të Rregullores së Kuvendit, kanë kërkuar në mënyrë të përsëritur mbledhjen e Këshillit në datat 22, 23, 29 dhe 30 dhjetor 2025, si dhe më 6 janar 2026. Sipas tyre, koha për njohjen me aktet ka qenë e mjaftueshme dhe natyra e kërkesës së SPAK-ut është e ngutshme, për shkak të rrezikut të prishjes së provave dhe intimidimit të dëshmitarëve.
Në kallëzim thuhet se, pavarësisht këtij detyrimi ligjor, Kryetari i Kuvendit ka refuzuar thirrjen e mbledhjes dhe njoftimin e rendit të ditës, duke cenuar të drejtën e deputetëve për të kërkuar mbledhjen e Këshillit dhe duke ndikuar, sipas PD-së, në mbarëvajtjen e hetimeve penale.
Grupi Parlamentar i Partisë Demokratike përfundon se, në këto rrethana, Kryetari i Kuvendit ka përmbushur elementët e veprës penale të “shpërdorimit të detyrës”, përmes mosveprimit në kundërshtim me Rregulloren e Kuvendit dhe duke dëmtuar interesat e shtetit dhe të përfaqësuesve të zgjedhur.
