Alqi Ballko dha dorëheqjen ditën e djeshme pasi SPAK e akuzoi si pjesë e aferës korruptive me tenderat.
Mësohet se për të shmangur një arrestim me pranga, Bllako do të zgjedhë që të depozitojë në Kuvend kërkesën për të lënë mandatin së bashku me avokatin e tij, ndërkohë që më pas do të vetëdorëzohet në policinë e Tiranës.
Në këtë mënyrë, mediave dhe publikut do t’i kursehet një show me deputetin socialist, tashmë të dorëhequr.
Nga ana tjetër Kuvendi ka thirrur sot mbledhjen e Këshillit të Mandateve dhe Rregullores, që do të diskutojë për imunitetin e Bllakos, gjë e cila tani duket të jetë e panevojshme, sa kohë që socialisti ka zgjedhur që të mos mbrohet përmes mandatit.
Alqi Bllako akuzohet se në rolin e sekretarit të përgjithshëm të Ministrisë së Mjedisit, ka falsifikuar dokumentet së bashku me Lefter Kokën, në mënyrë që përfituese të ishte kompania e biznesmenit Klodian Zoto.
Alqi Bllako akuzohet për shpërdorim detyre dhe korrupsion aktiv i funksionarëve publikë.
PAK i ka kërkuar Kuvendit që t’i heqë imunitetin deputetit Alqi Bllako, si i përfshirë në aferën e inceneratorëve.
Gjithashtu SPAK i ka dërguar një shkresë Kuvendit të Shqipërisë, duke argumentuar të gjitha arsyet se përse kërkojnë arrestimin e tij.
Në shkresën drejtuar Kuvendit, shprehet se Bllako, në kohën kur ka shërbyer si Sekretar i Përgjithshëm në Ministrinë e Mjedisit, në bashkëpunim me persona të tjerë, ka kryer veprime të kundraligjshme me dashje në ndërtimin e inceneratorit të Fierit, duke shkaktuar një dëm prej 16.288.344 lekësh.
