Një burrë me origjinë indiane, shtetas britanik, ka mbijetuar mrekullisht nga përplasja e avionit të Air India, që u rrëzua pak pas ngritjes nga aeroporti i Ahmedabadit, duke shkaktuar vdekjen e të paktën 241 personave.
Vishwash Kumar Ramesh, 48 vjeç, ndodhej në bord së bashku me vëllain e tij Ajay, i cili fatkeqësisht humbi jetën.
I vetmi i mbijetuar, Ramesh është aktualisht i shtruar në një spital pranë vendit të ngjarjes, vetëm pak metra larg nga rrënojat e avionit Boeing 787. Ai udhëtonte në vendin 11A, një pozicion pranë dritares në pjesën e mesme të avionit, mbi krahun e majtë.
Dëshmia e tij, e konfirmuar edhe nga autoritetet vendore, përshkruan momente të tmerrshme: “Rreth 30 sekonda pas ngritjes dëgjova një zhurmë të fortë. Pastaj gjithçka ndodhi në një çast.”
Pasagjeri i mbijetuar, që prej 20 vitesh jeton në Londër, kishte ardhur në Indi për të vizituar familjen. Ai mbeti i dëmtuar në gjoks, këmbë dhe sy, por pavarësisht plagëve, arriti të dalë nga rrënojat përmes copave të avionit dhe trupave të pajetë që e rrethonin.
Ramesh i ka treguar ekipeve të shpëtimit kartën e imbarkimit, si provë që ndodhej realisht në bord.
Sipas autoriteteve indiane, avioni kishte arritur një lartësi prej rreth 825 metrash para se të fillonte të bënte rënie të shpejtë.
Piloti kishte dhënë një sinjal emergjence, por nuk arriti të kontrollonte avionin, i cili u përplas në një zonë të banuar, duke shkaktuar një shpërthim të fuqishëm.
Trupat e 204 viktimave janë nxjerrë deri tani, ndërsa kërkimet vijojnë.
Rasti i Vishwash Ramesh ka tronditur opinionin publik dhe ka mbetur si e vetmja rreze shprese në një nga tragjeditë më të rënda ajrore të viteve të fundit në Indi.
