Një rritje ka pësuar sërish numri i rasteve me Covid-19 në Kosovë, ku janë identifikuar 29 raste të reja nga 6 që u raportuan dje dhe tashmë numri total i të prekurve ka shkuar në 1.298.
Instituri i Shëndetit Publik në Kosovë informon se rastet pozitive janë nga: komuna e Prishtinës 13 raste, komuna e Obiliqit 8 raste, komuna e Vushtrrisë 2 raste dhe me nga 1 rast vendbanimet: Zhiti-Viti, Lutogllavë-Prizren, Shushicë-Istog, Janjevë-Lipjan, Fushë Kosovë dhe Rahovec.
Sakaq, vetëm një pacient është shëruar në 24 orët e fundit dhe numri i përgjithshëm i të shëruarve është 913, teksa nga fillimi i epidemisë e deri tani 31 persona kanë humbur betejën me Covid-19.
Kosova është në javën e dytë të fazës së rihapjes prej fillimit të qershorit teksa ka dalë zyrtarisht nga ‘’Lock-Down’’.
Por, edhe në Kosovë nuk është përjashtuar mundësia e një rikthimi të masave për Covid-19 në rast se numrat në rritje do të vijojnë në mënyrë konstante.
NJËZET E NËNTË RASTE ME COVID-19 DHE NJË I SHËRUAR !
Sot më 10 qershor 2020, në Laboratorin e Mikrobiologjisë Molekulare në IKSHPK me metodën RT-PCR, janë testuar gjithsej 280 mostra të marra nga Klinika Infektive dhe gjurmimi i kontakteve të rasteve në terren.
Me SARS-CoV-2, janë konfirmuar 29 raste.
Rastet pozitive janë nga: komuna e Prishtinës 13 raste (sipas vendbanimit: 13 raste Prishtinë), komuna e Obiliqit 8 raste (sipas vendbanimit: 8 raste Milloshevë), komuna e Vushtrrisë 2 raste (sipas vendbanimit: 1 rast Druvar dhe 1 rast Vushtrri) dhe me nga 1 rast vendbanimet: Zhiti-Viti, Lutogllavë-Prizren, Shushicë-Istog, Janjevë-Lipjan, Fushë Kosovë dhe Rahovec.
Sot më 10 qershor 2020, është shëruar 1 pacient derisa numri i përgjithshëm i të shëruarve deri më sot është gjithsej 913 raste.
Nga data 08 shkurt deri më 10 qershor 2020, në Laboratorin e Mikrobiologjisë Molekulare në IKSHPK me metodën RT-PCR, janë testuar gjithsej 17.479 persona të dyshimtë në virusin SARS-CoV-2 dhe prej tyre pozitive rezultojnë gjithsej 1.298 raste, me gjithsej 31 raste të vdekjes të cilët kanë pasur sëmundje të tjera shoqëruese.
Në IKSHPK në vazhdimësi përgjatë 24 orëve janë duke u kontaktuar dhe mbikëqyrë të gjitha kontaktet e rasteve, si dhe kontaktet e kontakteve duke i obliguar për vetëizolim dhe të kërkojnë ndihmë mjekësore nëse kanë simptome.
