Koreja e Veriut dhe ajo e Jugut kanë patur një përplasje me armë zjarri në Zonën e Demilitarizuar (DMZ) e cila ndan të dy vendet, raporton BBC.
Ushtria e Seulit tha që të shtëna nga Veriu goditën një postë roje të Koresë së Jugut në qytetin kufitar qendror të Cheorwon, e cila i është kthyer po me ‘zjarr’, teksa ende nuk ka raporte për lëndime.
Incidente të tilla përtej kufirit më të fortifikuar në botë janë të rralla – e fundit ndodhi në vitin 2017, ndërsa nuk është e qartë se çfarë e shtyu Korenë e Veriut të hap zjarr.
Sekretari i Shtetit Amerikan Mike Pompeo ka thënë se të shtënat e shkrepura nga Koreja e Veriut besohet se ishin “aksidentale”, por nga ana tjetër zyrtarët ushtarakë në Jug thonë se nuk kishte asnjë shenjë të lëvizjeve të pazakonta të trupave.
Ata po mundohen të zbulojnë nëse ky ishte një aksident apo i qëllimshëm.
Ekziston një “mundësi e vogël” që të shtënat e shkrepura nga Koreja e Veriut të kenë qenë të qëllimshme, sipas ushtrisë së Koresë së Jugut, por në deri tani është e paqartë se çfarë ka ndodhur.
Nëse është një sulm i mirëmenduar nga Koreja e Veriut, atëherë kjo është një çështje shumë e rëndësishme.
Koha në të cilën vjen kjo ndodhi është interesante, pasi ka vetëm 24 orë që lideri i Koresë së Veriut Kim Jong-un u shfaq përsëri pas një mungese 21-ditore.
Gjatë muajve të fundit ka pasur gjithashtu një numër të madh stërvitjesh ushtarake në Veri për të përmirësuar gatishmërinë për tu përfshirë në një “luftë aktuale”, sipas mediave shtetërore.
Gjatë dy viteve të fundit është dashur shumë punë për të lehtësuar tensionet midis dy vendeve pasi Presidenti Moon Jae-in u takua me Kim Jong-un dhe të dy palët nënshkruan një marrëveshje ushtarake – sipas së cilës çdo goditje e qëllimshme e shkrepur do të shkelte atë pakt.
Zona e Demilitarizuar (DMZ) u krijua pas luftës koreane në 1953 në mënyrë që të krijonte një zone neutral midis dy vendeve dhe në dy vitet e fundit, qeveria në Seul është përpjekur të kthejë kufirin e fortifikuar në një zonë paqeje.
