Ditën e sotme edhe pas një mungese të gjatë në sallën e Kuvendit, ish-kryeministri Sali Berisha deklaron se do të kthehet të hënën në Kuvend.
Këtë fakt e ka bërë të ditur sot ish-kryetari i PD-së në një intervistë për ‘ABC news’, ndërsa shtoi se do të ulet në vendin e tij që ka pasur më parë në ulëset e Parlamentit.
“Betejë që nuk e ka parë ndonjëherë Shqipëria. Të hënën do shkoj në parlament. Unë kam edhe një axhendë pak si më të veçantë. Unë nuk shkëpus kurrsesi marrëdhëniet me parlamentin. Do bëj gjithçka që krahas takimeve të ruajmë edhe aktivitetin parlamentar që qytetarët të shohin të zë të së vërtetës në atë parlament që sot për sot përqendrimin e të inkriminuarve e ka më të lartë se çdo institucion peniticiar.
Vendimet e lul kimikut janë inekzistente. Ne i kemi shkarkuar nga Kuvendi i 11 Dhjetorit. Ai është kryetari i Ramës. Nuk është çështje selie apo zyre. Është çështje jetike e pluralizmit politik në Shqipëri. Nga e hëna e tutje në parlament do te jem një zë i fuqishëm. Ne i kemi të gjithë vendet në parlament. Ne nuk lëvizim nga pozicionet tona”, tha Berisha.
Kujtojmë se rreth orës 3 të mëngjesit të sotëm, Basha shkarkoi përfundimisht Sali Berishën. Pas këtij vendimi, ka reaguar lideri historik. Në një dalje për mediat, Berisha tha se ky vendim është njësoj si të ngrihen të vdekurit dhe të thonë se këta të tjerët nuk janë gjallë, ndërsa tha se Basha mbrohet me vrasës dhe trafikantë.
