Pandemia e koronavirusit ka pasur ndikimin të drejtpërdrejtë edhe në futboll, me sportin më të dashur që është goditur jo pak, teksa qeveria prej kohësh duket se e kishte harruar këtë çështje.
Më në fund sot, pas një “lufte” të gjatë shkresash dhe dokumentesh, Ministria e Shëndetësisë ka vendosur t’i japë një përgjigje Federatës Shqiptare të Futbollit, teksa Manastirliu u shpreh në një intervistë se sikundër çdo fushë e jetës, as futbolli nuk do të jetë i vetëm në luftën kundër koronavirusit.
Pas letrës së dërguar nga Federata, ministria i është përgjigjur se do të ketë një rihapje graduale të futbollit shqiptar dhe tashmë të dyja palët do të ulen për të diskutuar rreth futbollit në Shqipëri në këtë kohë pandemie që ka prekur çdo pjesë të shoqërisë.
”Komiteti Teknik i Ekspertëve po punon për protokollet e posaçme për hapjen graduale të aktiviteteve sportive, sipas strategjisë së ri-hapjes të miratuar nga ky komitet. Në këtë kuadër do të vlerësonim bashkëpunimin tuaj për vijimin e hartimit të protokolleve të posacme nëpërmjet krijimit të një Grupi të Përbashkët Pune. Jeni të lutur të dërgoni përfaqësinë tuaj për të finalizuar hartimin e këtyre protokolleve”, thuhet në përgjigjen e Ministrisë së Shëndetësisë.
Kujtojmë se Federata Shqiptare e Futbollit ka miratuar një fond të dytë emergjence për të ardhur në ndihmë të pjesës më të madhe të subjekteve që nuk do të kenë asnjë ndihmë nga shteti.
Pasi akordoi 400 milionë lekë të vjetra për periudhën 15 mars-15 prill, tani po përgatitet që të shpërndajë edhe 400 milionë të tjera për periudhën 15 prill-15 maj, teksa dëmi ekonomik për vitin 2020 në arkat e Federatës, prek 1 milion euro të sigurta.
Sakaq, FSHF ka gati edhe Protokollin Sanitar –paraprak për organizimin e ndeshjeve në stadium, protokoll që do të dakordësohet me autoritetet shtetërore sapo të vendosin një datë.
Protokolli
FSHF ka përshtatur dhe tashmë gati formatin gjerman të Protokollit sanitar, në një kohë që paraprakisht ekipet planifikohet që të zhvillojnë fazën parapërgatitore prej 2-javësh, si dhe do të kryejnë teste. Sipas protokollit përgatitur nga sektori i garave në FSHF, në drejtim të organizimit të lojërave pa spektatorë, koncepti bazohet në tre grupe pjesëmarrësish në ndeshje. Në këtë protokoll sanitar, siguruar nga ABC News, stadiumi do të jetë i ndarë në tre grupe personash sipas karakteristikave te aktivitetit që kryejnë:
NDARJA NE STADIUME:
(Zona1, Fusha) përbëhet nga lojtarët, trajnerët, stafi teknik dhe gjyqtarët.
(Zona2, Tribuna) përbëhet nga punonjës e transmetimeve TV, Stafi dhe Delegacionet e ekipeve dhe disa nga përfaqësues të tjerë të mediave. Ky grup mund të hyjë edhe në stadium, por duhet të mbajë një distancë nga grupi i gjelbër (Zona 1).
(Zona 3, Përreth Stadiumit) përfshin përfaqësues të tjerë të mediave dhe punonjës të tjerë. Pjesëtarët e këtij grupi mund të qëndrojnë vetëm jashtë territorit të Stadiumit.
Sipas protokollit që pritet të përshtatet për ndeshjet në kampionatin kombëtar të futbollit, parashikohet që për organizimin e një sfide maksimumi do të jenë jo më shume se 175 personash. Por për shkak të ndarjes në zona, nuk do të jetë I mundur grumbullimi I më shumë se 90 personave në të njëjtën kohë.
NUMRI I PERSONAVE TE GRUMBULLUAR:
Zona 1 Fusha dhe Zona Teknike 88 persona
Zona 2 Tribuna 55 persona
Zona 3 Perimetri I stadiumit 32 persona
Parashikohen teste të rregullta për virusin korona për lojtarët dhe stafin teknik. Ndër të tjera, duhet që rezultatet e testit të lojtarëve të bëhen të ditura jo më së vonese ora 10-të e mëngjesit të ndeshjes. Lidhur me pjesën e grumbullimeve stërvitore, ndeshjeve futbollistike etj., sipas protokollit të OBSH-së dhe rekomandimit të mjekëve, duhen ndjekur dhe zbatuar udhëzimet e mëposhtme në mënyrë rigoroze:
UDHEZIMET PER USHTRIMIN E AKTIVITETIT:
Një shërbim mjekësor sanitar, i pajisur me skaner për matjen e temperaturës, në hyrjen e stadiumit, për të gjitha subjektet e autorizuar.
Një dokument me të gjitha normat higjieno-sanitare të adoptuara në secilin impiant sportiv, përpara zhvillimit të çdo eventi, i cili u duhet prezantuar autoriteteve, në rast kërkese.
Një modul elektronik për të certifikuar subjektet që do të hyjnë në impiant dhe masa kontrolluese për të evituar sa më shumë rrezikun e infeksionit.
Do të vendosen dezinfektues duarsh në të gjitha këto mjedise për tu ardhur në ndihmë futbollistëve, stafeve dhe zyrtarëve;
Të gjithë stafet të qëndrojnë me maska dhe doreza gjatë punës, para, gjatë dhe pas ndeshjeve; Përdorimi i maskave dhe dorezave është i detyrueshëm sidomos gjatë udhëtimeve të ekipeve, pra në autobusë, në furgona dhe çdo grumbullim tjetër të detyrueshëm në vende të mbyllura;
Hotel ekskluziv për ekipin ose katin / zonat ekskluzive për të shmangur kontaktin me vizitorët e tjerë të hotelit.
Kush hyn në stadium, përveç skuadrave:
Zyrtarët e ndeshjes.
10 persona zyrtarë të autorizuar nga çdo skuadër, qëndrimi është I lejuar vetëm në tribunë dhe me një largësi prej 2 metra nga njëri-tjetri.
4 fëmijë për kapjen e topave.
Përgjegjësit e sigurisë publike 4 persona, stjuardët e parashikuar në zonat e piketuara deri në 20 persona, zjarrfikësit 4 persona, operatorët e ndihmës së shpejtë, të parashikuar sipas ligjit.
Vetëm operatorët televizivë dhe gazetarët e rrjeteve titullare të drejtave të transmetimit “live”.
Fotografët zyrtarë dhe zyra e shtypit e të dyja skuadrave.
Gazetarët dhe fotografët e autorizuar nuk do të jenë më shumë se 20 vetë, por ndërkohë ata do të jenë të ndaluar që të kenë kontakte me personelin e dy skuadrave.
Në tribunën e shtypit, të gjithë gazetarët dhe fotografët e akredituar do të duhet të qëndrojnë të paktën 2 metra larg njëri-tjetrit.
Në terrenin e lojës do të mund të zbresin vetëm fotografët zyrtarë të të dyja klubeve. Ndërsa ata të jashtmit do të kenë një vend të rezervuar dhe të kushtëzuar, por kurrsesi brenda terrenit të lojës.
