Para pak ditësh Italia solli në Shqipëri një ekip mjekësor prej 6 mjekësh në ndihmë të stafit tonë në luftën kundër COVID-19, dhe pas kësaj lajme të mira vijnë edhe për Kosovën.
Ky lajm u bë i ditur nga ministrja e Punëve të Jashtme të Kosovës,Meliza Haradinaj Stublla e cila tha Italia do të sjellë një ekip ushtarako-mjekësor për Kosovën në luftën anti-covid.
Më tej Haradinaj tha se për këtë gjest falenderoi dhe ministrin e Jashtëm të Italisë, Luigi Di Maio dhe i kërkoi atij që Italia të vazhdojë të jetë zë përkrahës për të drejtën e Kosovës për lëvizjen pa viza, tani që me të drejtë presim përmbylljen e këtij procesi.
Njoftimi i ministres Haradinaj
Zhvillova një telefonatë shumë përmbajtësore me Ministrin e Jashtëm të Italisë, Luigi Di Maio.
Shpreha mirënjohjen time për kontributin e Italisë në shtetndërtimin e Kosovës, si partner strategjik, veçanërisht në aspektin e ruajtjes së paqes dhe sigurisë në vend përmes komandës së KFOR-it.
Ministri Di Maio, më konfirmoi që do të dërgojë një ekip ushtarak-mjekësor nga Italia në ndihmë Kosovës në luftën anti-COVID-19, për këtë akt fisnik e falënderova përzemërsisht.
Kërkova nga homologu italian që Italia të vazhdojë të jetë zë përkrahës për të drejtën e Kosovës për lëvizjen pa viza, tani që me të drejtë presim përmbylljen e këtij procesi.
