Pas një “lufte të gjatë” me SHBA, presidentin Thaçi dhe LDK, duket se kryeministri i Kosovës Albin Kurti është dorëzuar dhe do heqë plotësisht taksën 100% ndaj mallrave serbe.
Mediat në Kosovë raportojnë se ditën e sotme Kurti ka nënshkruar dokumentin për shqyrtimin dhe miratimin në mbledhjen e ardhshme të qeverisë për heqjen e taksës.
Në bazë të këtij propozim, vendimi pritet të hyjë në fuqi më 1 prill 2020, ku Ministria e Financave në Kosovë dhe Doganat janë të detyruara të zbatojnë vendimin.
Kujtojmë se prej muajsh Kurti po përballet me një situatë të pakëndshme sepse Richard Grenell, por edhe forcat politike në vend, i kanë kërkuar të heqë taksën ndaj Serbisë dhe Bosnje-Hercegovinës.
Në këto kushte, Kurti lajmëroi në muajin shkurt se ka vendosur të pezullojë përkohësisht taksën ndaj Serbisë dhe në rast se kjo e fundit nuk njeh pavarësinë e Kosovës, taksa do rikthehej.
Mirëpo, ky vendim u kundërshtua sërish nga SHBA, ashtu si edhe nga presidenti Thaçi apo partia me të cilën Vetëvendosja ka nënshkruar koalicionin qeverisës, Lëvizja Demokratike e Kosovës.
Kujtojmë se SHBA ka “kërcënuar” me anulimin e investimeve të kompanive amerikane apo edhe tërheqjen e trupave ushtarake nga Kosova në rast se nuk hiqet taksa.
Ndërkohë, ditët e fundit Kurti është përfshirë në një përplasje me LDK, pas shkarkimit të ministrit të Brendshëm Agim Veliu, të cilin e akuzoi se ka përhapur panik për gjendjen e krijuar në Kosovë pas goditjes nga COVID-19.
Menjëherë, LDK i ka dërguar ultimatum Kurtit, duke thënë se do të bëjë një “mocion mosbesimi” kundër qeveris, çka do rrëzonte automatikisht Kurtin nga pushteti dhe në bazë të Kushtetutës kjo çon në zgjedhje të parakohshme.
