Partia Demokratike e qytetit të Elbasanit, i është përgjigjur ditën e sotme drejtuesit politik të Partisë Socialiste në këtë qytet Taulant Ballës. Kujtojmë se më herët numri dy i PS-së, i bëri thirje kryedemokratit Basha që “të mos kërcënojë kompanitë për të penguar punën e nisur për transformimin e Elbasanit”.
Në një deklaratë për mediat PD-ja e Elbasanit ka theksuar se kjo forcë politike është e angazhuar me gjithë fuqinë dhe energjinë për të sjellë në jetë planin që do të nxjerr bizneset nga kriza. PD-ja shprehet se sa më shumë afron data e zgjedhjeve, aq më shumë Taulant Balla aq më haluçinante bëhen shpifjet dhe sajesat e tij. Pak më parë edhe PD-ja e Tiranës i është kundërpërgjigjur kryeministrit Edi Rama.
Deklarata e Partisë Demokratike dega Elbasan
Sa më shumë afron data e zgjedhjeve, aq më haluçinante bëhen shpifjet dhe sajesat e Taulant Ballës. Partia Demokratike Dega Elbasan dhe Drejtuesi Politik, z.Bardhi janë angazhuar me gjithë fuqinë dhe energjinë për të sjellë në jetë planin që do të nxjerrë biznesin nga kriza, nga presionet e shantazhet e qeverisë dhe inspektorëve që lëshohen për të vënë gjoba me urdhër të Taulant Ballës. Koha kur Taulant Balla vendos se kush duhet të marrë tenderat, kush duhet të privatizojë pasuritë, kush duhet të punojë, po ngushtohet përditë e më shumë.
Për fat të keq, investimet në Elbasan dhe gjithë qarkun Elbasan kanë mbetur në vendnumuro prej 8 vitesh! Prandaj më 25 Prill qytetarët dhe sipërmarrësit, ekonomia e Elbasanit do të fitojë.
