Mos-mbyllja e fasonerive në kohë, duket se do shkaktojnë infektime të shumta në vendin tonë.
Qeveria arsyetoi se këto biznese nuk mund të mbyllen sepse po punojnë në kushte të sigurta dhe mbi të gjitha konsiderohen si biznese esenciale.
Një fasoneri në Krujë brenda pak ditësh infektoi 102 persona, ndërsa vetëm 9 prej tyre janë shëruar.
Pandemia u përhap brenda kësaj fasonerie, dhe më pas punonjëset e saj nga Kruja, Laçi dhe Kurbini e transmetuan edhe tek familjarët e tyre.
Së fundmi, duket se edhe fasoneritë në kryeqytet nuk i kanë shpëtuar virusit, pasi burime për Dosja.al pranë ISHP-së bëjnë me dije se në një fasoneri në autostradën Tiranë-Durrës janë infektuar 3 persona: dy punëtore dhe shefja e tyre, teksa nuk dihet nëse kanë infektuar edhe persona të tjerë.
Duke qënë se fasoneria është kthyer në një vatër infektimi, Instituti i Shëndetit Publik ka vendosur që të mbyllë biznesin.
Nga sa ka rezultuar deri tani, ndonëse drejtuesit e tyre bënin me dije se kishin respektuar të gjithë protokollet e përcaktuara nga Ministria e Shëndetësisë, duket se ato nuk janë përmbushur, ndërsa punonjëset kanë akuzuar se pretendimet e tyre nuk ishin të vërteta dhe se në fabrikë nuk kishin as sapun për duart.
Edhe kryedemokrati Lulzim Basha, ashtu si edhe figura të tjera kanë kërkuar mbylljen e tyre dhe përfshirjen e punonjësve në planin ekonomik të qeverisë.
