Licencat për investimin në impiante fotovoltaike të prodhimit të energjisë nga burimi diellor, duket se po kthehen si licencat minerare ose ato të HEC-ve lokale.
Pas parkut fotovoltaik të Karavastasë dhe pas një tjetri që po planifikohet për t’u ngritur në Nartë të Vlorës, ministrja e Energjetikës, Belinda Balluku, nuk kishte si të linte pa dhënë licencë edhe në zonën në mes, atë të Fierit.
Dy shoqëri të bashkuara në një, kanë depozituar pranë Ministrisë së Infrastrukturës dhe Energjisë, kërkesën për të ndërtuar një impiant me kapacitet 50 MW.
Vet MIE bëri me dije se, bashkimi i Përkohshëm i shoqërive: “BLESSED INVESTMENT” sh.p.k dhe “MATRIX KONSTRUKSION” sh.p.k, ka shprehur interesin dhe ka paraqitur pranë Ministrisë se Infrastrukturës dhe Energjisë, aplikimin për ndërtimin e një impianti fotovoltaik për prodhimin e energjisë nga burime të rinovueshme, me kapacitet të instaluar 50 MW.
Ky investim, nga sa thuhet nga të dhënat e publikuara nga MIE, nuk përfiton nga masat mbështetëse, në zonën Sheq-Marinas, të bashkisë Fier, Qarku Fier.
Kjo është në vazhdën e aplikimeve të tjera të bëra pranë MIE, ndërkohë që deri tani ende nuk ka një impiant me kapacitet të tillë të ndërtuar dhe të vënë në funksion edhe pse janë dhënë disa licenca të tilla.
Shumica janë impiante deri në 2MW, të cilët janë dhënë përmes vendimit që i konsideron koncesione atipike dhe që jepen vetëm me firmën e ministrit përgjegjës.
Aktualisht pritet që të nisë ndërtimi për impiantin fotovoltaik në Karavasta nga kompania franceze “Voltalia”.
Kjo e fundit, ofroi një çmim 24,89 euro për megavat në ankandin e mbajtur, shumë më i favorshëm sesa tavani prej 55 eurosh për megavat, që kishte vendosur më herët Ministria e Infrastrukturës dhe Energjisë në dokumentet e saj.
Parku fotovolatik i Karavastasë, është projektuar me fuqi 140 MW, ku 70 megavat janë të ndara për prodhim dhe shitje në treg të lirë dhe 70 megavat, me çmim të rregulluar.
Çmimi i rregulluar zgjat për 15 vite dhe do të blihet nga Operatori i Shpërndarjes së Energjisë. Vetëm pak ditë më parë, ministrja Belinda Balluku, bëri me dije se, do të hapet shumë shpejt gara edhe për një tjetër impiant fotovoltaik në Spitallë të Durrësit.
/GazetaReforma.com/
