Një pacient tjetër pacientë që ka rezultuar pozitiv me COVID-19, ka qenë i shtruar në Spitalin e Traumës.
Lajmi është bërë i ditur nga specialistja pranë ISHP-së Marjeta Dervishi, në përgjigje të interesin të medias.
“ Pacienti vjen pas një aksidenti në qytetin e Durrësit. Menjëherë pas konfirmimit ky pacient është transferuar në spitalin COVID-1 në spitalin Infektiv. Janë marrë të gjitha masat, sipas protokolleve përkatëse, për parandalimin e infeksionit në Spitalin e Traumës” – tha Dervishi.
Kujtojmë se më 10 prill u raportua se 2 të infektuar nga COVID-19 prej tre ditësh kanë qëndruar në Urgjencën e Spitalit Ushtarak, sepse nuk e pranonin se ishin infektuar.
Në momentin që dy të sëmurët janë paraqitur në Urgjencë u është bërë grafia dhe mjekja u ka treguar se janë pozitivë ndaj COVID-19, por pavarësisht konstatimit të mjekes, dy pacientët nuk janë bindur se janë të infektuar.
Të infektuarit i janë nënshtruar tamponit vetëm një ditë më parë, duke rezultuar pozitivë, teksa të gjithë ata që kanë pasur kontakte me dy të infektuarit, do të duhet t’u nënshtrohen testeve.
Në Shqipëri, ashtu si pothuajse kudo në botë, vijon lufta me COVID-19, teksa Ministria e Shëndetësisë ka njoftuar ditën e sotme se numri i të infektuarve ka shkuar në 446 dhe deri më tani janë regjistruar 23 viktima.
Ndërkohë betejën me COVID-19 e kanë fituar 217 persona.
