Pas 5 orësh të mbushura me trazira, përfundon protesta e opozitës përpara kryeministrisë. Kreu i Partisë Demokratike Lulzim Basha falenderoi pjesëmarrësit dhe njoftoi se javën e ardhshme do të mblidhen sërish për të kërkuar largimin e qeverisë Rama.
“Sot çdo kush e ka parë forcën e qytetarëve të bashkuar, të vendosur për të mos pranuar më një kryeministër dhe qeveri të kapur në vjedhje flagrante. Dua që në emër të opozitës t’ju shpreh mirënjohjen më të thellë qytetarëve që i dhanë zë revoltës që po e dëgjon gjithë bota. Le të zotohemi sot se kjo kryengritje do vazhdojë deri në përmbysjen e Ramës. Të enjten në orën 10:00 vijon protesta.”- u shpreh Basha.
Gjatë ditës së sotme, protestuesit u përplasën me policinë teksa përpiqeshin të hynin në brendësi të kryeministrisë. Gjatë këtyre përpjekjeve, u dëmtuan dyert e kryeministrisë dhe iu vu zjarri oborrit të godinës, ndërsa policia tentonte t’i sprapste me ujë dhe gaz lotsjellës. Sakaq, mësohet se 13 perosna janë shoqëruar në spital për të marrë ndihmë mjekësore.
