Pas gati 48 orësh kërkimesh intensive, është gjetur trupi i pajetë i kapitenit Arben Anamali, i cili u mbyt në ujërat e Liqenit të Shkodrës ndërsa përpiqej të shpëtonte dy turistë të huaj që kishin rënë në ujë.
Trupi u gjet gjatë ditës së tretë të operacionit të kërkimit, që nisi rreth orës 05:00 të mëngjesit të sotëm.
Në aksionin e kërkim-shpëtimit morën pjesë forcat operacionale dhe banorë të zonës, të cilët kërkuan në zonën ku dyshohej se kapiteni kishte rënë.
Kapiteni Anamali ishte babai i dy fëmijëve vinte nga një familje shkodrane. 51-vjeçari kishte ndjekur gjurmët e të atit, i cili gjithashtu ishte mjeshtër i motorave të barkave dhe skafeve.
Si ndodhi ngjarja
Pesë turistë izraelitë, të cilët po lundronin bashkë me të tjerë në anijen e drejtuar nga kapiteni Arben Anamali, u hodhën në ujërat e Liqenit të Shkodrës për t’u larë dhe më pas kërkuan ndihmë për t’u shpëtuar.
Kapiteni reagoi menjëherë dhe arriti të nxirrte nga uji tre prej tyre, ndërsa disa metra më tej shpëtoi edhe dy turistët e tjerë që rrezikonin të mbyteshin.
Gjatë përpjekjes për t’i shpëtuar ata, kapiteni 51-vjeçar, Arben Anamali, u mbyt. Turistët ndodhen në gjendje të mirë shëndetësore.
