Pas 3 orësh diskutime në Këshillin Politik duket se palët kanë rënë dakord për dy çështje deri në këto momente: atë të pranisë së Policisë gjatë gjithë procesit të zgjedhjeve dhe vendosjen e një sistemi monitorimi me kamera në qendrat e votimit.
Takimi ka nisur prej orës 17:00 dhe po vijon ende me dyer të mbyllura në Pallatin e Kongreseve, ku diskutimi është përqendruar në rolin e prokurorisë në zgjedhje si dhe hetimin e krimeve zgjedhore nga SPAK.
Synimi i vendosur nga vetë palët politike për të përmbyllur reformën zgjedhore brenda 31 majit, por edhe rritja e presionit ndërkombëtar dhe sidomos SHBA që kjo reformë të mbyllet brenda muajit, ka intensifikuar takimet e Këshillit Politik, ku gjatë kësaj jave takimi i sotëm i pasdites është i dyti që po zhvillohet.
Përfaqësuesja e opozitës parlamentare në Këshillin Politik të reformës zgjedhore është Rudina Hajdari, përfaqësuesi i mazhorancës Damian Gjiknuri dhe përfaqësuesit e PD-LSI, Oerd Bylykbashi dhe Petrit Vasili.
Ditën e sotme ambasadorja Yuri Kim pritet të takojë anëtarin e fundit politik të Këshillit Politik për Reformën Zgjedhore, Petrit Vasili, pasi raportohet se ka takuar një e nga një Damian Gjiknurin si përfaqësues i mazhorancës, Oert Bylykbashin si përfaqësues të opozitës jashtëparlamentare, Rudina Hajdarin “zërin” e opozitës së re, dhe së fundmi do takojë edhe Petrit Vasilin.
Kujtojmë se pak ditë më parë palët politike u dakordësun për 3 çështje; periudhë zgjedhore, kuotat gjinore dhe financimin e partive, ndërsa opozita theksoi se këto nuk janë çështjet më të rëndësishme.
Prezenca e OSBE-së në Shqipëri, ambasadori Bernd Borchardt, teksa reagoi sot, pohoi se po ndiqet me interes të veçantë përpjekjet e partive për kompromis për çështje të rëndësishme, që OSBE i ka vlerësuar si problematika për shumë vite.
