Spitali Infektiv ka shërbyer përgjatë këtyre dy viteve pandemi si qendra kryesore për shtrimin e të sëmurëve me Covid-19
Por tashmë nuk do të shërbejë më si spital Covid.
Spitali që përballoi ngarkesën më të madhe të trajtimit të rasteve me koronavirus, është boshatisur për t’iu nënshtruar rikonstruksionit.
Thekosjmë se pacientët transferohen në QSUT. Numri i pacientëve të shtruar me Covid- 19 është ulur ndjeshëm.
Në 24 orët e fundit, Ministria e Shëndetësisë raportoi se është shënuar 1 viktimë nga koronavirusi, ndërsa rastet e reja ishin 36. Pacientët që po marrin trajtim aktualisht janë 23, 3 nga të cilët në gjendje më të rënduar.
Ministria e Shëndetësisë i bëri apel qytetarëve të vaksinohen sa më parë, për të mbrojtur veten dhe shëndetin e të tjerëve. Vaksinat antiCOVID reduktojnë mundësinë e infektimit dhe shmangin në shkallë të lartë hospitalizimet dhe fatalitetet.
Çdo qytetar mbi 12 vjeç, mund të vaksinohet në qendrën shëndetësore ose në pikën më të afërt të vaksinimit të përqëndruar. Vaksinimi është i hapur edhe për fëmijët +12 vjeç me probleme të sistemit imunitar, me rekomandim nga mjeku.
MSHMS apelon të gjithë qytetarët e vaksinuar me dy doza, të drejtohen në qendrat shëndetësore ose pikat e vaksinimit të përqëndruar, për t’u vaksinuar me dozën e tretë përforcuese, sipas rekomandimit të mjekut të familjes.
Nëse dyshoni se jeni të prekur nga COVID19 apo keni shenja të sëmundjes, izolohuni menjëherë dhe kontaktoni me mjekun tuaj të familjes për t’u testuar sa më parë ose telefononi Urgjencën Kombëtare në numrin unik 127.
