Pas 10 ditësh në burg, lihet i lirë Rois Babasi, djali i ish-deputetit të Partisë Demokratike Ndriçimi Babasi.
Sipas Dosja.al gjykata mori vendimin për masën arrest me burg për 22-vjeçarin Babasi, gjatë kohës që ai ishte i shtruar në spital për shkak të plagëve që mori ditën e ngjarjes në një lokal në ish-Bllok.
Ky vendim ndaj tij u mor me argumentin se Prokuroria duhet të hetojë dhe të gjejë prova të reja.Sipas Prokurorisë, Babasi dyshohet se plagosi me armë zjarri 39-vjeçarin Gazmir Bushaj, ndërsa në konflikt janë përfshirë edhe persona të tjerë.
Por mesa duket Prokuroria nuk ka arritur të gjejë prova të tjera për të riun 22-vjeçar kështu ka vendosur ta lërë të lirë.
Kujtojmë se ngjarja e rëndë ndodhi më 16 korrik në ish-Bllok, ku si pasojë e një konflikti të çastit është plagosur me armë zjarri në këmbë, Gazmir Bushaj 39 vjeç, si dhe është dëmtuar me mjete të forta Babasi.
22-vjeçari Rois Babasi është edhe autori i dyshuar i cili ka plagosur me armë 39-vjeçarin në sherr e sipër.
Në cilësinë e provës materiale është sekuestruar arma e zjarrit, ndërsa janë marrë në pyetje edhe persona të tjerë të cilët ishin në lokal, ku nisi sherri.
Ndërkohë në kërkim nga policia është Even Babasi, djali tjetër i ish deputetit të PD, i cili qëlloi me armë zjarri Gazmir Bushaj, duke e plagosur në këmbë.
Ndaj Even Babasit, prokuroria e Tiranës ka ngritur dyshimet për akuzën e “Mbajtjes pa lejë të armëve” dhe “Plagosjes së rëndë me dashje”, ndërkohë që vazhdojnë kërkimet për arrestimin e tij.
