SPAK ka thirrur sot Sali Berishën për dosjen “Partizani”. Ai do të duhet të paraqitet sot në orën 10:00 në dyert e SPAK, pas urdhërit të lëshuar nga SPAK për t’u paraqitur.
Në këtë seancë të sotme pritet që Apeli të vendosë për masën e sigurisë ndaj ish-kryeministrit të vendit, lidhur me hetimet për dosjen “Partizani”, vendim i ankimuar nga dy avokatët e tij.
Kujtojmë se në seancën e parë ish-kryeministri nuk u paraqit. Po se çfarë do të ndodhë në seancën e orës 10:00 dhe nëse Berisha nuk paraqitet, mbetet për t’u parë pasi të gjitha opsionet janë të hapura, në varësi të vendimit të Apelit, i cili mund të lërë në fuqi vendimin ‘detyrim paraqitje’ apo ta rrëzojë atë.
Sipas juristëve, nëse Apeli pranon ankimimin e avokatëve dhe rrëzon masën e sigurisë, atëherë thirrja e Berishës në orën 10:00 në SPAK bëhet e pavlefshme.
Nëse Apeli lë në fuqi vendimin ndaj tij, dhe ish-kryeministri nuk paraqitet, atëherë SPAK ka të drejtë të kërkojë ashpërsim mase, por që kjo të ndodhë, do të duhet të kërkojë autorizim në Kuvend.
