Partia Demokratike e Shqipërisë po shënon sot 34-vjetorin e themelimit, në një ceremoni ku marrin pjesë kryetari Sali Berisha, deputetë të Grupit Parlamentar, drejtues politikë nga e gjithë Shqipëria dhe qindra mbështetës.
Në hapje të aktivitetit, u transmetua një mesazh nga Ervin Salianji, i cili ndodhet në burg.
Në mesazhin e tij, Salianji theksoi dëshirën për të qenë i pranishëm në këtë ditë të rëndësishme, duke nënvizuar rëndësinë e angazhimit të demokratëve në përballjet politike që i presin.
Në ceremoni u theksua gjithashtu rëndësia historike e kësaj partie, e cila u themelua më 11 dhjetor 1990 si forca e parë opozitare pas rënies së regjimit komunist.
Në ato momente kyçe për vendin, Partia Demokratike simbolizoi aspiratën e shqiptarëve për liri, demokraci dhe ndryshim.
