Parlamenti rus miratoi një projekt-ligj të martën që ndalon anëtarët e organizatave “ekstremiste” të shërbejnë si ligjvënës, një veprim që aleatët e kritikut të burgosur të Kremlinit Alexei Navalny thonë se synon t’i ndalojë ata të kandidojnë në zgjedhjet parlamentare të shtatorit, shkruan Reuters.
Projekt-ligji, të cilin dhoma e ulët e parlamentit miratoi në një lexim të parë, vjen ndërsa një gjykatë po konsideron të nxjerrë jashtë ligjit fondacionin anti-korrupsion të Navalny dhe grupet rajonale të fushatës si ekstremiste.
Drafti i legjislacionit propozon që të ndalohet çdo anëtar ose kryetar i grupeve të deklaruar ekstremistë për të kandiduar për vendet në dhomën e ulët të Dumës së Shtetit për periudha që variojnë nga një deri në pesë vjet.
Nëse miratohet, projektligji ka të ngjarë të prishë fushatat për parlamentin të njoftuara nga aktivistë të tillë si Lyubol Sobol, e cila aktualisht është në arrest shtëpie për të marrë pjesë në një protestë në mbështetje të Navalny. Sobol e përshkroi projekt-ligjin në Twitter si një përpjekje “antikushtetuese” për ta ndaluar atë të kandidojë në zgjedhje këtë shtator.
Para se të bëhet ligj, projektligji duhet të miratohet në dy lexime të tjera në dhomën e ulët, përpara se të mbështetet nga dhoma e sipërme dhe të nënshkruhet nga Presidenti Vladimir Putin.
Vasily Piskarev, një ligjvënës nga partia qeverisëse Rusia e Bashkuar që ishte bashkëautor i projekt-ligjit, tha se ishte e nevojshme të ndalohen njerëzit nga organizatat “ekstremiste” të mbajnë vende në parlament sepse ata mund të përdorin pozicionin e tyre “për propagandë dhe justifikimin e ideve të tyre si dhe për rekrutimin e pasuesve të rinj “.
Nëse Rusia shpall zyrtarisht Fondacionin Antikorrupsion të Navalny dhe grupet rajonale ekstremiste, autoritetet do të fitojnë fuqinë zyrtare për të burgosur aktivistët dhe për të ngrirë llogaritë e tyre bankare. Seanca e ardhshme gjyqësore në këtë çështje është caktuar për 9 qershor. Çështja tashmë i ka shtyrë aleatët e Navalny të shpërndajnë grupet rajonale. Aleatët e Navalny thonë se pretendimet e ekstremizmit janë një përpjekje për të zbehur kundërshtimin e tyre politik ndaj Rusisë së Bashkuar në zgjedhjet parlamentare.
