Parlamenti Evropian ka refuzuar një propozim të së djathtës ekstreme për të diskutuar atentatin e supozuar ndaj ish-presidentit amerikan Donald Trump dhe rritjen e dhunës politike në Evropë. Propozimi, i paraqitur nga grupi Patriotët për Evropën e Viktor Orban, u hodh poshtë me 337 vota kundër, 119 pro dhe 15 abstenime, raporton Politico.
Grupi Patriotët për Evropën, i formuar muajin e kaluar dhe tani grupi i tretë më i madh në Parlamentin Evropian, kërkoi një debat dhe një rezolutë që dënon dhunën politike. Megjithatë, përpjekja e tyre u mbështet vetëm nga grupet e ekstremit të djathtë, si Evropa e Kombeve Sovrane dhe grupi i konservatorëve dhe reformistëve evropianë, ku përfshihen edhe eurodeputetët e kryeministres italiane Giorgia Meloni.
Në një postim në rrjetet sociale, grupi Patriotët për Evropën kritikoi refuzimin e propozimit, duke theksuar se grupet tradicionale e kanë penguar një debat të rëndësishëm për sigurinë politike.
Partia Popullore Evropiane e qendrës së djathtë, Socialistët dhe Demokratët, Rinovimi liberal i Evropës, të Gjelbërit dhe e Majtë votuan kundër diskutimit të atentatit. Martin Širdevan, bashkëkryetari i grupit të majtë, deklaroi për Politico se një “kordon sanitar” është i nevojshëm për të parandaluar që pikëpamjet antidemokratike të bëhen të zakonshme.
Zëdhënësi i PPE sqaroi për Politico se kishte një marrëveshje mes grupeve politike për të mos shtuar debate të tjera në këtë seancë plenare, përveç mbështetjes për Ukrainën. Nga ana tjetër, Kinga Gal, nënkryetarja e parë e grupit Patriotët për Evropën, akuzoi shumicën majtiste-liberale për mosdëshirë të dënojnë përpjekjen për të vrarë Trump.
Deputeti belg i ekstremit të djathtë, Tom Vandendrische, gjithashtu shprehu zemërim për refuzimin e propozimit, duke e quajtur atë një akt hipokrizie dhe selektivitet ndaj demokracisë.
