Parlamenti Evropian ka votuar pro certifikatës dixhitale të Bashkimit Evropian për COVID-19, duke e çuar BE-në një hap më afër të finalizimit të nismës që do të hyjë në fuqi më 1 korrik. Plenari e miratoi atë me 546 vota pro, 93 kundër dhe 51 abstenim(shtetas të BE) dhe me 553 pro, 91 kundër dhe 46 abstenim (shtetas të vendeve të treta që banojnë në BE).
Para votimit, raportuesi i Parlamentit, ligjvënësi spanjoll Juan Fernando Lopez Aguilar tha se drita jeshile e parlamentit për certifikatën dixhitale të BE-së COVID do të “japë shtysën përfundimtare” që ajo të hyjë në fuqi në 1 korrik.
Sipas Euractiv, certifikata do të lëshohet falas nga autoritetet kombëtare dhe do të jetë në dispozicion ose në formën e një kodi QR në një telefon celular ose në letër. Kjo certifikatë do të vërtetojë se një person është vaksinuar kundër koronavirusit, ka pasur një rezultat të testit negativ të fundit ose është rikuperuar nga infeksioni. Kjo do t’i lejojë autoritetet të përcaktojnë statusin e një vizitori bazuar në të dhënat në vendin e tyre të BE-së. Certifikata do të lëshohet nga të gjitha vendet anëtare dhe do të duhet të pranohet në të gjithë Evropën. Është konceptuar si një përpjekje për të rivendosur lirinë e lëvizjes pas kufizimeve të lidhura me pandeminë, për të rritur ekonominë dhe për të shpëtuar sezonin e festave.
Më 17 Mars, Komisioni propozoi një tekst legjislativ që përcakton një kornizë të përbashkët për një certifikatë të BE. Kompromisi politik midis institucioneve të BE u arrit në procedurë urgjente në 20 maj. “Ne po flasim për shpejtësi rekord, në fund të majit arritëm një marrëveshje”, tha raportuesi spanjoll. Kompromisi lejon shtetet anëtare të miratojnë kufizime shtesë të udhëtimit të tilla si karantina, vetë-izolimi ose testimi, nëse është e nevojshme, për të mbrojtur shëndetin publik. Aguilar tha se Parlamenti është i kënaqur me parimet e proporcionalitetit dhe domosdoshmërisë kur bëhet fjalë për vendet anëtare që miratojnë çdo kufizim shtesë. Masa të tilla duhet t’u njoftohen shteteve të tjera anëtare dhe Komisionit të paktën 48 orë përpara. Ato gjithashtu duhet t’u komunikohen qytetarëve, në një mënyrë të qartë dhe miqësore me përdoruesit, të paktën 24 orë përpara.”Pra, kufizimet duhet të jenë të qarta, dhe shtetet anëtare duhet të justifikojnë pse dhe ata duhet të shpjegojnë gjithashtu qëllimin,” tha Aguilar.
