Mjeku i njohur Pëllum Pipero ka bërë parashikime në lidhje me ecurinë e COVID-19 në vendin tonë.
Në një lidhje me emisionin “Dita Jonë” në “A2”, Pipero tha se numri i rasteve të rënda është reduktuar, ndërsa numri i të shëruarve është rritur.
Sipas tij, rastet e reja që janë asimptomatikë nuk janë tregues i epidemisë dhe do të shërbejnë më vonë për studim.
Pipero u shpreh se epidemia po kalon, por virusi është duke qarkulluar mes nesh, ndërsa faza e dyte do të zgjasë pak më shumë.
Përsa i përket mundësisë së rikthimit të epidemisë në verë, Pipero theksoi se është shumë e ulët, ndërsa shtoi se do të kemi mundësi të shkojmë edhe në plazh.
“Po shtohet çdo ditë numri i pacientëve që shërohen dhe numri i rasteve të rënda është më i reduktuar. Natyrisht, media preferon më shumë lajmin, preferon të tregojë rastet e reja pozitive, por këto raste janë asimptomatike dhe nuk janë tregues i epidemisë. Ato janë thjesht tregues epidemiologjik që do t’i shërbejnë më vonë studimeve epidemiologjike për të na treguar se sa na preku koronavirusi. Epidemia po kalon dhe po bie në mënyrë të qëndrueshme. Faza e dytë zgjat pak më shumë, por duhet ta dimë që virusi është ende duke qarkulluar mes nesh. Duhet të jemi të kujdesshëm për të shikuar ritmin e transmetueshmërisë. Nuk mund të jemi tërësisht të sigurt pa pasur vaksinë apo ilaç kundër Covid-19. Por, muaji maj do të na gjejë shumë më të relaksuar Mundësia e rikthimit në verë është e vogël, por mendoj se mund të ketë valë të dytë në vjeshtë apo dimër. Jam besimplotë që do të kemi një verë të shëndetshme dhe do të kemi edhe plazhe”, tha Pipero.
