Policia e Kurbinit ka parandaluar një ngjarje kriminale që mund të kishte pasoja të rënda, pas një konflikti mes disa personash ku u përdor armë zjarri.
Sipas njoftimit zyrtar, rreth orës 11:00, në rrugën “Kurbini” në Laç, shërbimet e Policisë ndërhynë menjëherë pas marrjes së sinjalizimit për një sherr mes pesë shtetasve. Gjatë përplasjes dyshohet se është qëlluar me armë.
Në pranga ra 37-vjeçari me iniciale K. R., i njohur edhe si K. T., banues në Tiranë. Gjatë kontrollit, policia i gjeti dhe i sekuestroi një pistoletë tip “Glock”, e cila kishte fishek në fole gati për qitje.
Ndërkohë, katër personat e tjerë të përfshirë në konflikt, të identifikuar si G. D., 27 vjeç, banues në Tiranë; E. Sh., 29 vjeç; E. Sh., 34 vjeç; dhe E. R., 32 vjeç, banues në Laç, janë shpallur në kërkim dhe po punohet për kapjen e tyre.
Materialet i janë kaluar Prokurorisë pranë Gjykatës së Shkallës së Parë të Juridiksionit të Përgjithshëm Lezhë për veprime të mëtejshme, në lidhje me akuzat për “Mbajtje pa leje dhe prodhim të armëve dhe municionit”, “Kanosje” dhe “Prishje të qetësisë publike”, të kryera në bashkëpunim.
