Ministria e Shëndetësisë ka marrë disa vendime, teksa janë botuar në fletoren zyrtare. Mësohet se nga data 4 Janar të gjithë punonjësit e administratës publike, por dhe punonjësit e supermarketeve dhe të qendrave tregtare do mund të vazhdojnë punë vetëm nëse paraqesin certifikatën e vaksinimit të lëshuar nga e-Albania që vërteton vaksinimin e plotë, në formë dixhitale apo të printuar.
Ndërkohë nëse nuk jeni të pajisur me certifikatën, MSH, bën me dije se çdo punonjës duhet të paraqes çdo 5 ditë test PCR-je, të kryer sipas procedurës për kryerjen e testeve për efekte administrative, për të verifikuar që nuk jeni mbartës të infeksionit Sars-Cov-2. Të gjithë ata persona, të cilët e kanë kaluar Covid-in mund të paraqiten në vendin e punës me certifikatë shërimi Covid-19 të lëshuar nga portali e-Albania ose dokument të lëshuar nga autoritetet shëndetësore të vendit, që provon shërimin nga infeksioni Sars-Cov-2, me vlefshmëri deri në 6 muaj pas shërimit të personit.
Ajo që bëhet me dije është se nga paraqitja e këtyre tre dokumenteve të cituara, përjashtohen vetëm personat që kanë dokument mjekësor të lëshuar nga mjeku që tregon se pacienti nuk mund të kryejë vaksinën. Kujtojmë se Omicron është shfaqur edhe në vendin tonë, teksa duket se prodhon shumë simptoma të ngjashme me të ftohtin.
