Kryetari i Shoqatës së Biznesit të Vogël dhe të Mesëm të Shqipërisë, Albert Nasto ditën e sotme ka dhënë një intervistë për emisionin “Qou Vadis”, ku ka paralajmëruar grevë dhe protestë të biznesve javën e ardhshme.
Në një lidhje me Skype, Nasto u shpreh se nga java e ardhshme do të fillojnë protestat e bizneseve ndërsa i bëri thirrje qytetarëve të mbështesin këtë nismë kundër rritjes së çmimeve. Protesta ose greva e tyre do të zgjasë një orë dhe në atë periudhë do të mbyllen të gjitha subjektet në Tiranë apo në të gjithë Shqipërinë.
“Duke filluar nga java e ardhshme ne do fillojmë protestat ose një grevë një orëshe. Do të mbyllim subjektet, po diskutohet në Tiranë apo në gjithë Shqipërinë. Në grevë do të futen të gjitha bizneset që bëjnë jo më shumë se 140 milionë lekë të vjetra. Janë mbi 90% e bzinesit që do mbyllë subjektet, këtu ftojmë edhe qytetarët që ta përkrahin këtë nismë. Flitet për jetë a vdekje, flitet për mbijetesë të bisnesit të vogël. Kjo është një gjendje e papranueshme për ne”, u shpreh ai.
Sjellim në vëmendje se ditëve të fundit shumë qytetarë kanë protestuar përballë kryeministrisë pasi nuk janë dakord me vendimet e marra nga ana e qeverisë për rritjen e çmimit të disa produkteve e shërbimeve. Në protestë ata kanë parashtruar disa pika, mes tyre edhe ulja e TVSH-së në masën 10% të çmimit të energjisë për bizneset e vogla dhe familjet.
Kujtojmë këtu kërkesat e plota të qytetarëve:
-Ne propozojmë heqjen e TVSH-së për ushqimet e shportës
-Kërkojmë uljen e TVSH-së në masën 10% të çmimit të energjisë për bizneset e vogla dhe familjet
-Heqjen e taksës së qarkullimit në naftë
-Heqjen e akcizës së gazit
