Belind Këlliçi, gjatë debatit në “Çim Peka LIVE” në SYRI TV, deklaroi se do të padisë sërish Erion Veliajn për lidhjet e tij me mafian italiane ‘Ndrangheta.
“Nesër ne do të depozitojmë në SPAK një kallëzim të ri për Erion Veliajn, për lidhjet e tij me ‘Ndranghetën, për lidhjet kriminale me kompaninë ECO Tirana,” tha Këlliçi. Ai shtoi se nuk do të ndalen deri sa Veliaj të dërgohet para drejtësisë për “këtë skemë kriminale të padëgjuar dhe të paprecedentë jo vetëm në vendin tonë, por edhe në Ballkan.”
Këlliçi shprehu pakënaqësinë për punën e SPAK në lidhje me inceneratorin e Tiranës, duke thënë: “Kemi depozituar 1200 faqe prova të pakontestueshme te prokurori Dritan Premçi, i cili ka firmosur fletëthirrjen për Veliajn para SPAK.”
Sipas tij, Premçi ka hequr fakte nga dosja për inceneratorin e Tiranës që përfshijnë drejtpërdrejt Veliajn, duke theksuar: “Altin Dumani kishte përfshirë në dosjen për Arben Ahmetaj, ku citohej 11 herë Erion Veliaj.”
Këlliçi njoftoi se aksioni do të vijojë në orën 11 para bashkisë së Tiranës.
